Qoldaýshylar kóbeıip keledi

Munan bylaıǵy jerde Global qurylys kompanııasy Ýnıversıada-2017 oıyndarynyń seriktesi jáne Qazaqstannyń shańǵy jarysy boıynsha áıelder quramasynyń resmı demeýshisi mindetin atqarmaq. Osydan 10 jyl buryn qurylǵan Qazaqstan ulttyq shańǵy federasııasynda tuńǵysh ret óz jeke demeýshisi paıda bolyp otyr. Osylaısha, seısenbi kúni Almatyda 2017 jylǵy XXVIII Dúnıejúzilik qysqy Ýnıversıadaǵa daıyndaý jáne ótkizý jónindegi dıreksııa men Global qurylys kompanııasy yntymaqtastyq týraly memorandýmǵa qol qoıdy. Ońtústik astanadaǵy eń iri qurylys kompanııalarynyń biri bolyp tabylatyn Global  shańǵy jarystary boıynsha áıelder quramasyn qoldaý jóninde sheshim qabyldap otyr. «2017 jyly Almatyda ótetin XXVIII Dúnıejúzilik qysqy Ýnıversıadaǵa daıyndaý jáne ótkizý jónindegi dıreksııa» dırektorynyń orynbasary Nurjan Ábilqaıyr mańyzdy oqıǵaǵa oraı: «Bıznes salasynyń Ýnıversıadaǵa shyn nıetpen deýmeýshilik kórsetýge umtylǵanyna qýanyp otyrmyz. Atalmysh kompanııa sportshylarǵa naqty kómek kerek ekenin bilip, birinshi ret seriktes bolýǵa nıet bildirdi. Sportshylarymyz barynsha jaıly orynda jarystarǵa daıyndalyp, jaqsy oıyn kórsetýdi qalaıdy. Qazir olarǵa qaı turǵydan bolsa da kórsetiletin qoldaýlar asa mańyzdy», – dedi. Global qurylys kompanııasy baqylaý keńesiniń tóraǵasy Muhıt Ázirbaev mundaı aıtýly oqıǵa ilýde bir ǵana bolatyny alǵa tarta kele: «Biz turǵyn úı keshenderin turǵyzatyn qurylys kompanııasy retinde sport salasynyń damýyna septigimizdi tıgizip otyrmyz dep esep­teımiz. Máselen kópqabatty úılerdiń tur­ǵyndary úshin sport qoljetimdi. О́ıtkeni bizdiń jobalarymyzdyń ishki qurylymdarynda sapaly balalar jáne sport alańdary bar aýlalar oılastyrylǵan. Sebebi, ár sportshy óz mansabyn sol aýladan bastaıdy. Al Ýnıversıada sekildi aıtýly oqıǵaǵa ortaqtasyp otyrǵanymyzǵa qýanyshtymyz. Sondaı-aq, bolashaǵynan úmit kúttirgen jas sportshylarǵa qoldaý kórsetý týraly sheshim qabyldadyq. Jańa bıiktikterdi baǵyndyrý úshin olarǵa qolaıly jaǵdaılar týǵyzǵymyz keledi», deıdi. Demeýshilikke bólingen qarjynyń bir bóligi sporttyq kıim-keshekter men qural-saımandardy (shańǵy men bekitkishtiń eki túri) satyp alýǵa jumsalmaq. Jáne bul qarajat sporttyq jıyn­darǵa jáne túrli jarystarǵa, sonyń ishinde res­pýblıkalyq jáne halyqaralyq saıystarǵa qatysý daıyndyqtaryna jumsalady. Qazir áıelder qura­masynda 8 komanda múshesi bar, olar keshe ǵana Qazaqstannyń shańǵy jarystary boıynsha kýbogyn laıyqty deńgeıde aıaqtady. Atap aıtqanda, Anna Shevchenko jáne Irına Bykova qurama qorjynyna úsh pán boıynsha eki altyn, úsh kúmis jáne eki qola medal qosty. «Shańǵy jarystary jónindegi ulttyq federasııa» QB bas hatshysy Andreı Nevzorov: «Sportshylardyń oıyndarǵa daıyndyǵy qashanda orasan zor kúsh jumsaýdy qajet etedi. Sondaı-aq, buǵan aıtarlyqtaı shyǵyn ketedi. Máselen, bir kásipqoı shańǵyshynyń saımandary shamamen 1,7 mln teńge turady. Bizge memleket tarapynan kóp kómek kórsetilýde, alaıda osyndaı úlken kompanııanyń senim artyp, shynaıy nıet bildirýi biz úshin úlken qurmet. Onyń ústine sportshylardyń rýhy kóteriledi. Bizge senedi, demek jeńemiz degen sóz». Qazaqstan Respýblıkasynyń eńbek sińirgen bapkeri Aleksandr Batıaıkın: «Bizdiń qyz-jigitterimiz shamamen 8 oqý-jattyǵý jıynynda bolyp qaıtty. Ulttyq komandanyń qatary jattyǵý kezinde tamasha nátıjelerdi kórsetip, kelesheginen mol úmit kútýge bolatyn jas sportshylarmen tolyǵýda. Álem kýbogynda biz júldeli oryndardy alyp keldik. Sportshylar Ýnıversıadaǵa daıyndalýda, eń kem degende úsh medaldi jeńýdi úmit etip otyrmyz». Aınash ESALI, «Egemen Qazaqstan» ALMATY