Abaılańyz, otshashý!

Búginde Jańa jyl merekesiniń basty daıyndyǵy kózdiń jaýyn alǵandaı etip shyrsha bezendirý men keń dastarqandy jaınatyp qoıý ǵana emes, otshashýdyń alýan túrin molynan satyp alýǵa degen umtylysqa ulasyp ketti. Jańajyldyq túngi aspandaǵy «otshashý báıgesine» atsalysýǵa ásirese, bala ataýlynyń áýes keletinin eskersek, álbette, eń aldymen qaýipsizdik jaǵyn esten shyǵarmaýǵa tıispiz. Almaty Tótenshe jaǵ­daı­lar departamentiniń qyzmet­kerleri jergilikti polısııa qyzmet­kerle­rimen birge qaladaǵy sapasyz pırotehnıka ónimderin anyqtaý maqsatynda, zańsyz ónimderdi satatyn oryndarǵa tekserý jumys­taryn júrgizýge kiristi. TJD ınjenerlik-ınspe­tor­lyq quramy tarapynan jyl saıy­n mereke qarsańynda qatań júrgiziletin tekserýlerdiń ar­qasynda, zańsyz jolmen satylatyn pırotehnıkalyq ónimderdi satýdyń ýaqyt ótken saıyn azaıy­p kele jatqan­dyǵyn aıta ketý kerek. Kásipker­ler de keıingi jyldary otshashý buıymdaryn zańsyz satýǵa saqtyqpen qarap, sertıfı­kattalǵan ónimdermen saýdasyn qyzdyrýǵa bet bura bas­tady. Tutynýshylardyń ózderi de jeke bas qaýipsizdigine kóbirek kóńil bóletin bolǵandyqtan, jańajyldyq otshashýlardy tek arnaıy dúkenderde satyp alýǵa umtylatyn boldy. Solaı desek te, túrli-tústi otshashý, shýly shartyldaq sııaqty ónimderdi paıdalanýda qaýipsizdik erejelerin saqtaýdyń mańyzdylyǵyna mán bergen TJD qyzmetkerleri paıdalanar aldynda pırotehnıkalyq buıymnyń qoldaný nusqaýlyǵyn muqııat oqyp shyǵýǵa, ónimderdi qoldanýǵa qatysty shekteýlerdi qatań saqtaı otyryp, tutatar aldynda qaýipsiz alań tańdap alýǵa, otshashýdyń jaramdylyq merzimi men daıyndalǵan ýaqytyna aıryqsha kóńil bólýge, qoldaný tásili jónindegi mátinniń qazaq jáne orys tilderinde anyq ári aıqyn qariptermen túsindirilgenine mán berýge keńes beredi. Osyndaı qarapaıym qaýip­sizdik erejelerin saqtaǵanda ǵana otshashýdan taraǵan juldyzdy órnekter sulýlyǵyn tamashalap qana qoımaı, merekelik kóńil kúı men qýanyshqa da kirbiń túspeıtinin umytpaǵan abzal deı­di mamandar. Mıra BAIBEK, «Egemen Qazaqstan» ALMATY