El Táýelsizdiginiń mereıtoıy qarsańyńda atyraýlyq poshta ókilderi úshin de oń ózgerister men ıgi jańalyqtar oryn aldy. «Qazposhta» AQ óz klıentterine kórsetiletin qyzmet túrlerine ózgertýler engizip, jańartý baǵdarlamalaryn iske asyrýda. Sonymen qatar, qalanyń birneshe bólimshesinde jóndeý jumystary júrgizilip jatyr.
«Qazir jóndeý jumystary qolǵa alynǵan bólimshelerdiń biri Abaı kóshesi, №6 úıinde ornalasqan ortalyq qyzmet kórsetý bólimshesinen bólek №7, №5 jáne №3 poshta baılanysy bólimshelerine de jańartý jumystary júrgiziledi. Budan basqa oblystaǵy tórt aýdan (Qurmanǵazy, Qyzylqoǵa, Jylyoı, Isataı) ortalyǵyndaǵy bólimsheler de kezegimen jańartylatyn bolady», deıdi Atyraý oblystyq fılıalynyń dırektory Baýyrjan О́tepbaev.
«Samuryq-Qazyna» ál-aýqat qorynyń qoldaýymen iske asyp jatqan bul baǵdarlama aıasynda turǵyndarǵa yńǵaıly bolý úshin de biraz eńbek jasaldy. Bul rette, sálemdemelerdi alý qyzmeti de burynǵydan áldeqaıda jeńil ótetinin atap ótken jón. Endi klıentterge kezekte turýdyń qajeti joq. Ol úshin arnaıy «sálemdemeler sýpermarketi» jumys jasaıdy. Klıent aldyn ala SMS arqyly habarlandyrylady. Keıin óz poshta bólimshesinde termınal kómegimen zattary turǵan uıashyǵynyń nómirin alyp, sálemdemesin ózi alady. Eń bastysy, jeke basyn rastaıtyn jeke kýáligi bolýy shart. Bul kompanııanyń shyǵyndaryn qysqartýǵa da edáýir septigin tıgizbek.
Sonymen qatar, poshta bólimsheleri birshama zamanaýı qurylǵylarmen qamtylmaq. Bólimder birneshe zalǵa bólinedi. Bunyń aldynda qajetti qyzmetteri ártúrli adamdar bir kezekke tursa, endi árqaısysy úshin arnaıy bólim jumys jasaıtyn bolady. Bul da klıentter men qyzmetkerlerdiń ýaqytyn únemdeýge birden-bir jol. Jańartylǵan poshtalarda qarjylyq aýdarymdar, poshta baılanysy, aqsha aıyrbastaý syndy qyzmetter úshin arnaıy bólimder ashylmaq. Olardyń barlyǵy da bankomat, postomat sııaqty jańa tehnologııalarmen jabdyqtalady. Al jeke tulǵalar men korporatıvtik klıentter úshin arnaıy operasııalyq zal iske qosylady. Aıta ketý kerek, múmkindigi shekteýli azamattar úshin de arnaıy, tez ári ońaı kórsetiletin qyzmetter qarastyrylǵan.
Budan bólek, halyqpen tikeleı qarym-qatynas ornatyp, qystyń qaharly aıazy men jazdyń shilińgir ystyǵynda da aıaqtary talmaı jumys jasaıtyn poshtashylarǵa qýanýǵa sebep tabyldy. El egemendiginiń 25 jyldyǵyna oraı olarǵa qyzmette paıdalanylatyn 8 kóliktiń kilti saltanatty túrde tabystaldy. Aldaǵy ýaqytta elimizde áli de 40 kólik pen qajetti qural-jabdyqtar bólinbek. Al jóndeý jumystarynan elimiz boıynsha júz poshta bólimshesi ótýi tıis. Jáne bul kútip turǵan jaqsy ózgeristerdiń tek bir parasy ǵana.
Bek KENJEEV
ATYRAÝ
