Astana men Almatyda baspana saýdasy qyza bastady

2017 jyly jyljymaıtyn múlik naryǵynda jaǵdaı turaqty bolady, dep jazady Habar24. "Qazir belsendiliktiń artqanyn baıqap otyrmyz. О́tken jylmen salystyrsaq, ortasha ósim 7 paıyzdan 23 paıyzǵa deıin kóterilgen. Sondyqtan elde satý kólemi bir jylda 14 paıyzǵa artty dep aıta alamyz," - deıdi Qazaqstan rıeltorlar qaýymdastyǵy tóraǵasynyń orynbasary Nına Lýkıanenko. Páter satý kórsetkishinde Almaty men Astana kósh bastap tur. Úshtikti eldiń batysy túıindeıdi. Statıstıka komıtetiniń sandaryn sóıletsek, «Komfort sanatyndaǵy» jańa úılerdiń Qazaqstandaǵy ortasha quny sharshy metrine 248 200 teńgeden keledi. Al qoldanystaǵy páterdiń sharshy metri anaǵurlym arzan. 188 800 teńge. Astanada jańa páter alýdy ekiniń biriniń qaltasy kótermeıdi. Biraq ol baspana qojaıyny bolǵysy keletin dáýletti jandardyń qarasy az emes. Atyraýdaǵy baǵa Almatydaǵy naryqtan aspasa kem túspeıdi. Qoldanystaǵy páterlerdiń ahýalyn saralap kórsek, Almatydaǵy baspana baǵasy birinshi orynda tur. Ekinshi orynda Aqtaý. Sarapshylardyń boljaýynsha, jańa jyldan bastap sharyqtaǵan qun qaıta túsýi múmkin. "Jańa úıler baǵasy sál qymbattaýy múmkin. Al qoldanystaǵy páterler kerisinshe tómendeıdi. Sebebi, jyl ótken saıyn eski baspananyń baǵasy kóterilýine negiz joq. Mundaı jaǵdaı tek bizde, ásirese Astana men Almatyda bolyp keldi," - deıdi «Atameken» UKP tóraǵasynyń orynbasary Qaırat Qudaıbergen. Sarapshylar, taýyq jylynda baspanaly bolatyndar kóbeıedi degen pikirde. Sonymen qatar, «Nurly jer» memlekettik baǵdarlamasy óńirlerdegi naryqty jandandyrady degen senimderin bildirdi.