Vedomstvo derekterine sáıkes, bólshek nesıelerdiń qarqyny 2024 jylmen salystyrǵanda birshama báseńdegen. Atap aıtqanda, ótken jyly bul kórsetkish 23,9% bolǵan.
Halyqqa berilgen qaryz qurylymyna kóz júgirtsek:
- Ipotekalyq nesıe 14,6%-ǵa ósip, 6,9 trln teńgege jetti.
- Tutynýshylyq nesıe kólemi 21%-ǵa artyp, 16,7 trln teńgeni qurady. Sonymen qatar kepilsiz tutynýshylyq nesıelerdiń ósý qarqyny 2024 jylǵy 29,3%-dan 2025 jyldyń qorytyndysy boıynsha 14,5%-ǵa deıin tómendedi.
Agenttik bul baıaýlaý tutynýshylyq qaryzdar segmentindegi táýekelderdi shekteý boıynsha qabyldanǵan sharalarmen baılanysty ekenin atap ótti. Atap aıtqanda, jańa kepilsiz nesıe berý kóleminiń ósý qarqyny 22,6%-dan 6,1%-ǵa deıin azaıǵan.
Bul rette tutynýshylyq nesıe berýdiń ósýine avtonesıeler aıtarlyqtaı úles qosty. Bir jyl ishinde olardyń kólemi 42,4%-ǵa ósip, 4 trln teńgege jetti.
2025 jylǵy jeltoqsanda ulttyq valıýtadaǵy halyqqa berilgen nesıeler boıynsha ortasha saralanǵan mólsherleme 18,3% boldy. Bul 2024 jylǵy 17%-ben salystyrǵanda joǵary.
2026 jylǵy 1 qańtardaǵy jaǵdaı boıynsha merzimi 90 kúnnen asqan bereshegi bar halyq qaryzdarynyń úlesi 4,3%-dy nemese 1,07 trln teńgeni qurady. Bir jyl buryn bul kórsetkish 3,8% bolǵan.
Jalpy alǵanda, Qazaqstannyń bank sektory ósim kórsetip otyr. 2025 jyly bankterdiń aktıvteri 15%-ǵa artyp, 70,8 trln teńgege jetti. Bul ekonomıkaǵa beriletin nesıe kóleminiń keńeıýimen baılanysty.
