«FLOW/AǴYN» – ulttyq horeografııanyń damý evolıýsııasyn beıneleıtin kórkemdik joba. Baǵdarlamada Anvara Sadyqovanyń ár jyldary qoıǵan jáne elimizdiń jetekshi horeografııalyq ári teatr ujymdarynyń repertýaryna engen tańdaýly týyndylary usynylady. Kesh aıasynda horeograftyń qazaq neohoreografııasy baǵytyndaǵy izdenisteri men shyǵarmashylyq qoltańbasy keńinen tanystyrylady.
Konserttiń basty oqıǵasy – fransýz kompozıtory Morıs Raveldiń mýzykasyna jazylǵan «Zamana jańǵyryǵy» («Eho epoh») etno-baletiniń tusaýkeseri. Jańa qoıylym ulttyq bı elementterin zamanaýı plastıkamen ushtastyryp, dáýirler sabaqtastyǵyn sahnalyq til arqyly jetkizýdi maqsat etedi.
Is-sharaǵa Qazaqstan men Qyrǵyzstannyń óner sheberleri qatysady. Atap aıtqanda, Qazaqstannyń Halyq ártisi Seken Turysbekov, «TURAN» etno-folklorlyq ansambli, Qyrǵyz Respýblıkasynyń eńbek sińirgen ártisi Gúlzada Rysqulova, «Daryn» memlekettik jastar syılyǵynyń laýreaty Ardaq Eleýsiz, Qazaq memlekettik sımfonııalyq orkestri (dırıjeri – Qazaqstannyń eńbek sińirgen qaıratkeri Erbolat Ahmedııarov), «Astana Opera» memlekettik opera jáne balet teatry solısi Sultanbek Ǵumar, Abaı atyndaǵy Qazaq ulttyq opera jáne balet teatry solısi Dınara Qudabaeva, halyqaralyq baıqaýlardyń laýreaty Kórkem Sholoshova, «GULDER» ansambliniń ártisteri men Qazaq ulttyq horeografııa akademııasy stýdentteri óner kórsetedi.
Anvara Sadyqova – 70-ten astam horeografııalyq kompozısııa men eki balettiń avtory. Onyń qoıylymdary Almaty horeografııalyq ýchılıshesi, Qazaqstan Respýblıkasynyń Memlekettik akademııalyq bı teatry, «ASTANA OPERA» memlekettik akademııalyq opera jáne balet teatry, «ASTANA BALLET» teatry jáne basqa da shyǵarmashylyq ujymdardyń sahnasynda qoıylǵan.
Ispanııa Ulttyq baletiniń ártisi Astanada sheberlik saǵatyn ótkizdi
Aıta keteıik, horeograf halyqaralyq jáne respýblıkalyq baıqaýlardyń 30-dan astam laýreaty men Gran-prı ıegerin tárbıelegen. Sonymen qatar ulttyq horeografııa tarıhyna arnalǵan derekti fılmderdiń avtory, ǵylymı-zertteý maqalalar men kitaptardyń avtory jáne halyqaralyq baıqaýlar qazylar alqasynyń múshesi retinde de tanymal. «Zamana jańǵyryǵy» etno-baletiniń premerasy – ulttyq bı óneriniń jańa kezeńin aıqyndaıtyn mańyzdy mádenı oqıǵa bolmaq.
