Elbasy bıznesti tekserýshi sheneýnikterdiń azaımaǵanyn synady

Úkimettiń keńeıtilgen otyrysynda Nursultan Nazarbaev Bas prokýratýra men “Atameken” ulttyq kásipkerler palatasyna tekserý-baqylaý qyzmetterine revızııa júrgizýdi tapsyrdy. Prezıdent memlekettik qyzmetkerlerdiń qysqartylýynan keıin de olardyń sol qyzmette otyra beretinin synady.  «Tımur Muratuly (ulttyq ekonomıka mınıstri – red), múmkin bul máselemen sen aınalysarsyń. Úkimet tekseristiń azaıǵanyn, táýekeldi basqarýdyń jańa júıesiniń engizilgenin, memlekettik qyzmettiń elektrondy formatqa kóshkenin aıtyp esep beredi. Alaıda, tekserýshi organdardaǵy qyzmetkerlerdiń sany áli azaımaı tur. Biz olardyń sanyn qysqarttyq qoı, nege olar sol orynda áli otyr. Tekserýshilerdi azaıtamyz, biraq sheneýnikterdiń sany sol qalypty. Men Úkimetke Bas prokýratýramen jáne “Atamekenmen” birlesip tekserýshi organdarǵa revızııa jasap, nátıjesin týra bir aıdan keıin maǵan baıandaýdy tapsyramyn. Kimniń nemen aınalysyp otyrǵanyn anyqtańdar», — dedi memleket basshysy. 2016 jyldyń 9 aıy qorytyndysy boıynsha, shaǵyn jáne orta bıznes shyǵaratyn taýar men qyzmet kólemi 7 paıyzǵa azaıyp ketken. Jumys istep turǵan ShOB sýbektileri 7 paıyz azaıyp, ondaǵy qyzmetkerler sany 3 paıyz kemigen. «Tekserýshi kóp bolsa, bıznes qalaı damıdy? Sońǵy 10 jylda jyl saıyn normatıvti-quqyqtyq aktiler qabyldaımyz. Olardyń sany qazir 4 esege kóbeıdi. 2016 jyldyń ózinde bıznesti retteıtin túrli 6 myń akt qabyldandy. Respýblıka boıynsha qazir bıznesti tekseretin 61 vedomstva bar. Onyń 45-i ortalyq bolsa, 16-sy jergilikti organdar. Taıaýda Baqytjan Ábdirulymen áńgimelestik, qarap otyrsaq, tis aýrýyn emdeıtin jeke menshik stomatologııalar bar, al basqa aýrýlardy emdeıtin klınıkalar nege ashpasqa?» — dedi Nazarbaev.