Memleket basshysy Qasym-Jomart Toqaev Qazaqstannyń týrıstik áleýetin ashý jáne ony tıimdi paıdalaný strategııalyq mańyzdy mindet ári memlekettik saıasattyń basym baǵyty ekenin birneshe márte atap ótken bolatyn. II elordalyq forým ótken jylǵy kásibı alańnyń zańdy jalǵasyna aınalyp, qabyldanǵan bastamalardy kúsheıtip, kásibı ózara is-qımyl aıasyn keńeıtti. Is-shara Astana qalasynyń ákimdigimen jáne «Astana Tourism» týrızmdi damytý ortalyǵy» JShS-men jáne Astana gıdter klýbymen birlesip uıymdastyrylyp keledi.
«Prezıdenttik ortalyq ekinshi jyl qatarynan Astana qalasynyń ákimdigimen jáne «Kazakh Tourism» ulttyq kompanııasymen birlesip, óz alańynda kásibı qaýymdastyq ókilderin jınap otyr. О́tken jyly dál osy jerde elordalyq gıdter men ekskýrsııa júrgizýshileriniń I forýmy bastaý alǵan bolatyn. Sońǵy jyldary elimiz týrızm salasynda turaqty ári serpindi ósim kórsetip keledi: jyl saıyn týrıster sany artyp, olardyń geografııasy keńeıip, ınvestısııalar kólemi ulǵaıyp, jańa baǵyttar ıgerilip, ınfraqurylym damyp jatyr. Bul – Memleket basshysy qoıǵan salanyń damý qarqynyn eki eseleý jónindegi strategııalyq mindetke sáıkes júrgizilip jatqan júıeli memlekettik saıasattyń naqty nátıjesi», dedi Prezıdenttik ortalyqtyń dırektory Baqytjan Temirbolat.
B.Temirbolattyń aıtýynsha, 2025 jylǵy 28 qańtarda ótken Úkimettiń keńeıtilgen otyrysynda Memleket basshysy osy baǵyttaǵy berik ustanymyn taǵy da rastady jáne týrızmdi Qazaqstan ekonomıkasynyń ósý draıverleriniń biri retinde aıqyndady. Osyǵan baılanysty týrıstik salanyń ınvestısııalyq tartymdylyǵyn arttyrý, kólik ınfraqurylymyn, sonyń ishinde áýe baǵyttaryn damytý, týrıstik nysandardy ınjenerlik ınfraqurylymmen qamtamasyz etý, jańa týrıstik aımaqtardy damytý sııaqty basym baǵyttar belgilendi.
«Nátıjesinde, 2025 jyly otandyq týrızm salasyna salynǵan ınvestısııalar kólemi 1,2 trln teńgeden asyp, 2024 jylmen salystyrǵanda 32%-ǵa artty. О́z kezeginde, Astana Qazaqstan ǵana emes, Ortalyq Azııadaǵy jetekshi týrıstik ortalyqtardyń biri retindegi pozısııasyn senimdi túrde nyǵaıtyp keledi. Buǵan yqpal etetin birqatar faktordyń ishinde elordalyq gıdter men ekskýrsııa júrgizýshileriniń joǵary daıarlyq deńgeıi men kásibı biliktiligi negizgi ról atqarady. Gıd-ekskýrsııa júrgizýshi – bul tek týrısterdi alyp júretin adam ǵana emes. Ol – eldiń ókili, tarıhı mura álemine jol kórsetýshi, qonaqtardyń Qazaqstan týraly kózqarasyn qalyptastyratyn mádenı elshi. Onyń kásibıligine, bilimine, sheberligi men jeke qasıetterine saıahatshylardyń áseri qanshalyqty jarqyn ári este qalarlyq bolatyny tikeleı baılanysty. Qazirgi ýaqytta Prezıdenttik ortalyq – elimizdegi táýelsiz Qazaqstannyń saıası tarıhyn prezıdenttik ınstıtýt prızmasy arqyly zerdeleýmen, júıeleýmen jáne nasıhattaýmen aınalysatyn jalǵyz tarıhı-memorıaldyq mekeme. Bul, ásirese, táýelsizdigimizdiń 35 jyldyǵy atalyp ótetin mereıtoılyq jyly aıryqsha sımvoldyq mánge ıe», dedi óz sózinde Baqytjan Temirbolat.
Astana qalasynyń Investısııalar jáne kásipkerlikti damytý basqarmasy basshysynyń orynbasary Maqsat Jańabaev óz pikirin bildirdi.
«Árbir gıd-ekskýrsııa júrgizýshiniń róli erekshe: týrıst úshin nysandardy jaı ǵana kórý emes, qalanyń damý tarıhyn, onyń biregeıligi men qundylyqtaryn bilý mańyzdy. Bul mindetti tek sizder júzege asyrasyzdar. Halyqaralyq tájirıbege qarasaq, onda «tabysty qalalyq destınasııalar» gıdterdiń kásibı qaýymdastyǵymen júıeli túrde jumys júrgizetinin kórsetedi. Vena, Sıngapýr, Barselona sııaqty iri týrıstik ortalyqtarda gıd-ekskýrsııa júrgizýshileri týrıstik saıasattyń seriktesteri jáne qala brendisiniń mańyzdy bóligi retinde qarastyrylady. Olardyń usynystary týrıstik ónimdi qalyptastyrý jáne týrıstik qyzmet sapasyn baǵalaý kezinde tikeleı eskeriledi», dedi ol.
Forýmǵa elordanyń týrıstik qaýymdastyǵynyń, memlekettik organdardyń ókilderi, óńirlik jáne halyqaralyq salalyq sarapshylardy qosa alǵanda 130-dan astam ókil qatysty. Pikirtalas barysynda ekskýrsııalyq qyzmetti damytý men týrıstik servıstiń sapasyn arttyrý, sondaı-aq ishki týrızmdi yntalandyrýdyń jańa sheshimderin izdestirý máseleleri talqylandy. Forým baǵdarlamasy plenarlyq otyrys pen taqyryptyq paneldik sessııalardy qamtydy.
«Qonaqtarymyzdy qarsy alyp júrgen gıdter men ekskýrsııa jetekshileri, dál sizder adamdarǵa osy jerge ne úshin kelgen áserlerdi syılaısyzdar. Sizderdiń sózderińiz, sizderdiń áńgimelerińiz Qazaqstannyń beınesin qalyptastyrady. Osyǵan baılanysty gıd mamandyǵy – óte jaýapty ári óte bedeldi kásip. О́ıtkeni elimiz týraly qalaı baıandaısyzdar, soǵan qaraı adamdar bul jerden tek sýrettermen ǵana emes, júrekterinde saqtalatyn, keıin otbasysyna, dostaryna jáne ózgelerge aıtyp jetkizetin oqıǵalarmen qaıtady», dedi «Kazakh Tourism» UK» AQ Basqarma tóraǵasy Talǵat Ǵazızov.
Plenarlyq otyrysta Týrızm jáne sport mınıstrligine qarasty Týrızm ındýstrııasy komıteti tóraǵasynyń mindetin atqarýshy Nurbol Baıjanov, «Astana Tourism» týrızmdi damytý ortalyǵy» JShS basqarma tóraǵasy Artem Kvashýk, «Atameken» QR UKP Týrızm departamentiniń dırektory – basqarýshy dırektor Damıla Kýnanova sóz sóıledi.
Birinshi paneldik sessııa aıasynda elordalyq gıdtermen, mýzeı ekskýrsııa júrgizýshilerimen jáne Visit-ortalyqtar ókilderimen ózekti taqyryptar talqylandy. Atap aıtqanda, «Mýzeılik ekskýrsııalyq tájirıbelerdegi ádistemelik tásilder» seksııasynda Prezıdenttik ortalyqtyń ekskýrsııalyq baǵdarlamalary tanystyryldy. Qatysýshylar mýzeılik ekskýrsııalardy ázirleý men ótkizýdiń zamanaýı ádistemelik tásilderimen tanysyp, aýdıtorııamen tıimdi jumys isteý quraldaryn talqylaýǵa múmkindik aldy.
Ekinshi paneldik sessııada salany zańnamalyq retteý men murany ınterpretasııalaýdyń halyqaralyq tásilderi qarastyryldy. О́z tájirıbesimen jáne saraptamalyq bilimimen Grýzııa ekotýrızm qaýymdastyǵy basqarma tóraǵasy Natalııa Bahtadze-Englender, sondaı-aq «Interpret Europe» (Germanııa) Eýropalyq mádenı murany ınterpretasııalaý qaýymdastyǵynyń syrtqy baılanystar jónindegi úılestirýshisi Dýbravko Fııachko bólisti.
Forým qorytyndysy boıynsha ekskýrsııalyq salany odan ári damytýǵa, týrıstik qyzmetterdiń sapasyn arttyrýǵa, Qazaqstannyń mádenı jáne týrıstik áleýetin nyǵaıtýǵa baǵyttalǵan usynymdar ázirlendi.
Prezıdenttik ortalyqta Ulttyq Quryltaıda kóterilgen máseleler talqylandy
