Bıatlonnan Qazaqstan quramasy dopıng qoldandy degen kúdikke ilindi

Avstrııada ótip jatqan bıatlonnan álem birinshiligi kezinde Qazaqstan quramasy dopıng qoldandy degen kúdikke ilindi, dep habarlaıdy vesti.kz. Jergilikti janarmaı quıý beketteriniń birinde belgisiz sportshylar medısınalyq qaldyqtar salynǵan qoraptar men jarys qujattaryn tastap ketken. Avstrııanyń dopıngke qarsy ulttyq ortalyǵynyń júrgizgen saraptamasynyń nátıjesinde atalmysh qoraptar men qujattar Qazaqstan delegasııasyna tıesili ekendigi anyqtaldy. Osyǵan baılanysty, jergilikti 30-ǵa jýyq polısııa ókilderi Qazaqstan delegasııasyn tekserip, ár túrli medısınalyq quraldar men uıaly telefondardy tárkilegen. Artynsha Qazaqstan quramasynyń barlyq sportshylarynan qan-synamalary alyndy. «Biz ózimizge 100 paıyzǵa senimdimiz. Arymyz taza. Jaǵdaıdy túsindirmesten alyp ketti. Múmkin jattyqtyrýshylarǵa mán-jaıdy túsindirgen bolar. Ázirge biz eshnárse bilmeımiz», - deıdi qazaqstandyq shańǵyshy Olga Poltoranına. «Avstrııa federaldyq polısııasynyń baspasóz máslıhatynda málimdegendeı, Anthols mańynda medısınalyq dári-dármekterdiń qaldyqtary bar qoraptar tabylǵan. Dál sol jerden Qazaqstan quramasy dárigeriniń akkredıtasııasy tabyldy. Keshe qonaq úıde bizdiń komandany tintip shyqty. Dárigerdiń medısınalyq dári-dármekteri tárkilendi. Biraq, bizde barlyq zattyń ruqsaty bar. Sondaı-aq, polısııa tabylǵan zattardyń tekserilip jatqandyǵyn málimdedi. Olardyń tyıym salynǵandyǵy nemese joqtyǵyn saraptama kórsetedi. Bizdiń komanda dopıng jáne DNK testin tapsyrdy. Endi saraptama nátıjesin kútip otyrmyz. Avstrııanyń dopıng agenttigi qoraptarda tabylǵan dári-dármekterdiń saraptamasyn aldy», - dedi QR Bıatlon federasııasynyń bas hatshysy Manas Úsenov.