Foto: Densaýlyq saqtaý mınıstrligi
Tizbe eki baǵyt boıynsha jasaqtalady
Mınıstrlik medısınalyq mamandyqtar boıynsha qosymsha bilim berý uıymdarynyń tizbesin qalyptastyrýdyń jańa qaǵıdalaryn bekitti. Endi ýákiletti organ tizbeni eki bólek baǵyt boıynsha jasaqtaıdy:
− dárigerlerdi oqytatyn zańdy tulǵalar;
− orta medısınalyq personaldy daıarlaıtyn uıymdar.
Bul tásil ár sanattaǵy mamandardy daıarlaý ereksheligin eskerýge múmkindik beredi.
Tizbege engizýdiń mindetti sharty – uıym qyzmetiniń túrlerinde qosymsha medısınalyq bilim berý baǵdarlamalaryn iske asyrý kózdelgenin rastaıtyn quqyq belgileıtin qujattardyń bolýy.
Infraqurylym men resýrstarǵa qoıylatyn talap artty
Jańa qaǵıdalar bilim berý ortalyqtarynyń ınfraqurylymy men materıaldyq-tehnıkalyq bazasyna qatysty ólshemsharttardy edáýir qatańdatady. Buǵan deıin mindetti akkredıtteý, bekitilgen oqý baǵdarlamalary jáne halyqaralyq aqparattyq derekqorlarǵa qol jetkizý talap etilse, endi oǵan qosymsha birqatar shart engizildi.
Atap aıtqanda, uıymdarda:
- bilim berý qyzmetine lısenzııanyń jáne (nemese) ǵylymı uıym mártebesiniń bolýy;
- óziniń klınıkalyq bazasynyń nemese praktıkalyq daıarlaý úshin akkredıttelgen medısınalyq uıymdarmen sharttarynyń bolýy;
- zamanaýı sımýlıasııalyq jabdyqtar, zerthanalyq baza jáne kompıýterlik tehnologııalarmen tolyq qamtylýy;
- memlekettik organdardyń biryńǵaı kólik ortasyna qosylýy qarastyrylǵan.
Bul talaptar bolashaqta formaldy oqytýǵa jol bermeı, naqty tájirıbege negizdelgen sapaly bilim berýdi qamtamasyz etýdi kózdeıdi.
QazMed Digital: Medısınalyq volonterlik jańa deńgeıge shyqty
Júıeli monıtorıng jáne kóshpeli tekserý
Mınıstrlik tizbeni turaqty túrde jańartyp otyrady. Ol úshin uıymdardyń qyzmetine júıeli monıtorıng júrgizilip, qajet bolǵan jaǵdaıda kóshpeli tekserýler uıymdastyrylady.
Vedomstvo ókilderiniń aıtýynsha, materıaldyq-tehnıkalyq baza men klınıkalyq resýrstardyń naqty jaǵdaıǵa sáıkestigi qatań tekseriledi. Bul talapqa saı kelmeıtin uıymdardyń tizbede qalýyna jol berilmeıdi.
Ashyq irikteý – sapaly kadr kepili
Jańa normalar bilim berý ortalyqtaryn irikteýdiń ashyq ári ádil júıesin qalyptastyrýǵa múmkindik beredi. Nátıjesinde medısına qyzmetkerleri ǵylymı áleýeti jetkilikti, zamanaýı jabdyqtalǵan jáne tolyqqandy klınıkalyq bazasy bar uıymdarda ǵana biliktiligin arttyra alady.
Qabyldanǵan ózgerister densaýlyq saqtaý júıesiniń kadrlyq áleýetin nyǵaıtýǵa jáne halyqqa kórsetiletin medısınalyq kómektiń sapasyn arttyrýǵa baǵyttalǵan. Sapaly bilim – sapaly qyzmettiń negizi. Al bul qadam medısına salasyndaǵy jaýapkershilikti odan ári arttyra túsedi.
Medısına fakýltetiniń stýdentteri jańa Konstıtýsııa jobasyn talqylady
