«Temirlan» ne úshin jyl tańdaýy atandy?

Árıne, bul kitapty el tarıhyn tereń tanyp, dúnıetanymyn keńeıtkisi kelgenderdiń oqyǵany nemese qyzyǵa qolǵa alary anyq. Degenmen, úlgi eterlik bastamanyń orta jolda qalmaı, nátıjeli dástúrge aınalǵany qýantady. Aıtyp otyrǵanymyz – «Bir ólke – bir kitap» oblystyq aksııasy. Bul osydan úsh jyl buryn, búginde Shymkenttegi Otyrar ǵylymı-ámbebap kitaphanasynyń dırektory Kúlııa Aıdarbekovanyń oblystyq mádenıet basqarmasynyń tizginin ustaǵan kezdegi ıgi bastamalarynyń biri bolatyn. «Bir ólke – bir kitap» oblystyq aksııasynyń 2017 jylǵy tańdaýy jýyrda anyqtaldy. Jazýshylar, bir top zııaly qaýym ókilderi, tilderdi oqytý jáne damytý salasynyń qyzmetkerleri, kitaphanashylar, oqyrmandar basqosyp, pikir alysa kele, 2017 jyly ólkemizde ortaqtasa oqıtyn kitap – jazýshy, halyqaralyq Alash syılyǵynyń ıegeri Erkinbek Turysovtyń «Temirlan» kitaby dep belgiledi. Osy arada aıta ketelik, 2014 jyly – S. Erýbaevtyń «Meniń qurdastarym» romany, 2015 jyly – áńgime janrynyń has sheberi T. Álimqulovtyń «Telqońyr» áńgimesi, 2016 jyly halyq aqyny Qazanǵap Baıbolulynyń kitaptary tańdalǵan bolatyn. Jazýshy Erkinbek Turysovtyń «Temirlan» tarıhı romanynda álemge aıan orta ǵasyr ámiri Aqsaq Temirdiń aıaqtalmaǵan aqyrǵy joryǵy tusynda, búgingi Ortalyq Azııa men Iran, Ońtústik Qazaqstan jerindegi jaǵdaı baıandalady. Budan alty ǵasyr buryn ótken oqıǵalar jaıyndaǵy tarıhı derek, el ishinde saqtalǵan ańyzdar negizinde avtor jıhanger padıshahtyń tulǵasyn jáne ony qorshaǵan ortanyń tirshilik-tynysyn sýretteıdi. Túrkistan shahary túrki áleminiń 2017 jylǵy mádenı astanasy bolyp jarııalanǵan tusta bul ádebı eńbektiń tanymdyq quny arta túseri anyq. Qazaqstan Respýblıkasyna eńbegi sińgen qaıratker, halyqaralyq «Alash» ádebı syılyǵynyń laýreaty, jazýshy Erkinbek Turysovtyń jeke mýzeı-kabıneti bar. Otyrar ǵylymı-ámbebap kitaphanasynda. Bul jazýshynyń eńbegi baǵalanyp, jasalǵan qamqorlyqtyń biri bolsa kerek. Jýyrda onda jazýshynyń bes tomdyq tarıhı-kórkem shyǵarmalary men «Máńgilik saryn», «Báıdibek» atty taǵylymǵa toly kitaptarynyń tusaýkeserine oraı kezdesý keshi bolyp ótti. Ǵalymjan ELShIBAI, «Egemen Qazaqstan» ShYMKENT