Almatyda basqarma basshysy jumysynan bosatyldy

Tabıǵı resýrstar jáne tabıǵatty paıdalanýdy retteý basqarmasynyń basshysy Eldar Kıldıbaev qyzmetinen bosatyldy, - dep habarlaıdy Almaty ákimdiginiń baspasóz qyzmeti. Búgin Almaty qalasynyń ákimi Baýyrjan Baıbek qar tazalaý jumystary máselesine qatysty jıyn ótkizdi. Onda aýdan ákimderi, basqarma basshylary men qalalyq kommýnaldyq qyzmettegiler qatysqan. Tabıǵı resýrstar jáne tabıǵatty paıdalanýdy retteý basqarmasynyń jumysy nashar dep baǵalanǵan. Nátıjesinde Tabıǵı resýrstar jáne tabıǵatty paıdalanýdy retteý basqarmasynyń basshysy Eldar Kıldıbaev qyzmetinen bosatyldy. "Biz bylaı dep aıtamyz: Almaty - adam turatyn qala, alaıda joldar, qıylystar áli kúnge deıin tazalanbaǵan. Turǵyndarǵa jaıly jaǵdaı jasaý kerek. Qoǵamdyq kólik qatynaıtyn joldardy tazalaý kerek", - dedi Baýyrjan Baıbek. "Jıyn qorytyndysy boıynsha Almaty ákimi aýdan ákimdiktegilerine, sondaı-aq, qaladaǵy barlyq qyzmet ókilderine qar jaýǵan kezde osyndaı jaǵdaı qaıtalanbas úshin qajetti sharalardy oılastyryp qoıýyn tapsyrdy", - dedi baspasóz qyzmetindegiler.