OQO-da ónerkásip óniminiń kólemi artty

Búgin Ońtústik Qazaqstan oblysynyń ákimi Janseıit Túımebaevtyń tóraǵalyǵymen apparattyq májilistiń kezekti jıyny ótti, dep habarlady OQO ákiminiń baspasóz qyzmeti. Selektorlyq otyrysqa oblystyq basqarma basshylary men aýdan, qala ákimderi qatysty. Kún tártibinde 2 másele - oblystyń 10 aılyq nátıjesimen áleýmettik-ekonomıkalyq damý qorytyndylary jáne Úkimettik selektorda tyndalatyn máseleler qaraldy. Jıyndaǵy birinshi másele boıynsha sóz alǵan oblystyq ekonomıka jáne bıýdjettik josparlaý basqarmasynyń basshysy Rahymberdi Mýlkemanovtyń málimetinshe, 2016 jyldyń 10 aıynyń qorytyndysymen oblystyń áleýmettik – ekonomıkalyq damýynda oń serpin baıqalýda. Atap aıtqanda, ónerkásip óniminiń kólemi 643,1 mlrd. teńgeni qurap, respýblıkada 3-orynǵa turaqtasa, ken óndirý ónerkásibinde 191,3 mlrd. teńgeniń ónimi óndirilip, 2015 jyldyń sáıkes kezeńinen 4 % artty. О́ńdeý ónerkásibinde 396 mlrd. teńgeniń ónimi óndirilip (8,5% artty), ındýstrııalyq-ınnovasııalyq damý baǵdarlamasy aıasynda jyl basynan 3,9 mlrd. teńgege 4 joba iske asyrý arqyly 159 jumys orny ashylǵan. Degenmen, basqarma basshysynyń málimetinshe, aldyn ala boljam boıynsha jyldyń qorytyndysymen 10 ındıkatordyń oryndalmaý qaýipi bar. Tarqatyp aıtsaq, atalǵan ındıkatorlardyń 3-i kásipkerlik, ındýstrıaldy-ınnovasııalyq damý jáne týrızm basqarmasyna, 2-i aýyl sharýashylyǵy basqarmasyna, 3-i jumyspen qamtý jáne áleýmettik baǵdarlamalar basqarmasyna, 2-i densaýlyq saqtaý basqarmasyna tıesili kórsetkishter. Mysal retinde aıtsaq, ınvestısııa tartý týraly tapsyrma birqatar aýdan, qalalarda tómen kúıde qalyp otyr. Degenmen, aýdan ákimderi sońǵy eki aılyq kórsetkishti qosyp, kemshilikterdi túzetýge múmkindik bar ekenin jetkizdi. Aýyl sharýashylyǵy jalpy óniminiń naqty kólem ındeksiniń jyldyq  jospary 105% bolsa, 10 aıda 101,2% qurap otyr. Tamaq ónimderi óndirisiniń negizgi kapıtalyna tartylǵan ınvestısııanyń naqty kóleminiń ındeksi boıynsha jyldyq jospar 100,2% bolsa, naqty 29,8% qurap otyr. Jumyssyzdyq deńgeıi boıynsha jospar - 5% bolsa, salalyq basqarma jyldyń qorytyndysymen 5,3% bolady dep boljanýda. Joǵaryda kórsetilgen salalardaǵy kemshilikter boıynsha basqarma basshylary men tıisti aýdan, qala ákimderiniń jaýaptarynan soń, J.Túımebaev jyl sońyna deıin ındıkatorlar kórsetkishin josparly mejege jetkizip, basqarma basshylarynyń birigip jumys isteý kerektigin tapsyrdy.