Elorda ákimi jańa avtobýs baǵdarlaryn iske qosý jáne aıaldama keshenderin ashý boıynsha jedel sharalar qabyldaýdy tapsyrdy, dep habarlady Astana ákimdiginiń baspasóz qyzmeti.
Onyń aıtýynsha, elordada salynǵan joldardy (800 km asa) eskersek, 250-ge jýyq aıaldama ornatý kerek. Olardy jobalaý kezinde Astananyń klımattyq jaǵdaılaryn eskerý qajet. Sonymen qatar, qala basshysy jańa aıaldamalardyń jaıly bolýy tıis ekendigin atap ótti. Negizinen, bul keshender memlekettik-jeke menshik áriptestik esebinen salynatyn bolady, al joba 2017 jyldyń birinshi jartysynda júzege asyrylady.
Qaladaǵy jańa aıaldama pavılondary men avtobýs marshrýttary kóshe-jol jelisiniń damýyna qaraı paıda bolady. 2016 jyldyń sońyna deıin Astanada 45 jańa shyny jáne perforasııalanǵan aıaldama abattandyrylady. Buǵan qosa, jabyq tıpti jańa aıaldamalar jobalanýda. Olar jolaýshylar aǵyny tyǵyz jerlerde ornatylmaq. Sondaı-aq, kólemdi jabyq saýda jáne tehnıkalyq orynjaılardan, ashyq alańnan turatyn avtostansııalar jasalady. Onyń aýmaǵynda tez tamaqtaný pýnkti, qoǵamdyq dárethanalar, tólemder qabyldaý pýnkti, laıt-bokstar jáne t.b. bolady.
Sonymen qatar, Áset Isekeshev avtobýs parkterin jańartý, jolaýshylar tasymaly qyzmetiniń sapasyn arttyrý, avtobýstardyń qozǵalys ıntervalyn azaıtý jáne eski mashınalardy qoldanystan shyǵarý máselelerine nazar aýdardy. Ákimniń atap ótýinshe, elorda halqynyń sany udaıy ósip otyrady, sáıkesinshe qoǵamdyq kólikke túsetin júkteme artady. Qazirgi kezde kún saıyn 700-den asa qoǵamdyq kólik jolǵa shyǵady, olar 875 myń adamǵa qyzmet kórsetedi.
Munymen qosa, 2017 jyly Astananyń avtobýs parkteri IVECO markaly 210 zamanaýı jaıly avtobýspen tolyqpaq. Jańa jyljymaly quramdy satyp alý Eýropa qaıta qurý jáne damý bankiniń ınvestısııalyq qoldaýynyń arqasynda múmkin bolyp otyr. Jańa avtobýstar aqparattandyrý, aýa baptaý, jylytý, beınebaqylaý júıelerimen, sondaı-aq, múmkindigi shekteýli jandarǵa jáne balalar arbasymen júrgen ata-analar úshin arnaıy pandýstarmen jabdyqtalady.
