– Búgin sizder men bizder úshin erekshe saltanatty kún! Ýnıversıtet óziniń úshinshi býynyn úlken ómirge attandyrǵaly tur. Mańyzdy shara halyqaralyq EKSPO kórmesiniń ashylý qarsańynda ótkizilip otyr. Álemdik deńgeıdegi oqý ornynda bilim alý árbir adam úshin asqaq abyroı, mereıli mártebe dep sanaımyn. Barshańyzdy dıplom tapsyrý rásimine oraı, shyn júregimmen quttyqtap, úlken baqyt pen tabys tileımin. Bul ýnıversıtet bizdiń asa mańyzdy Táýelsizdik jyldarynda qabyldaǵan jobamyz bolyp tabylady. Bul bilim berý úderisiniń syrtqa negizdelgen oqý orny. О́kinishke qaraı, mundaı oqý orny Qazaqstanda buryn bolǵan emes. Ashylǵanyna 7-aq jyl bolǵan oqý ordasy ózimizdiń elde de, basqa elde de asa bedeldi oqý ornyna aınaldy, dedi Elbasy.
Prezıdent óz sózinde bilim berý úshin shet elderdiń irgeli oqý oryndarynyń tańdaýly ǵalymdary shaqyrylyp, ǵalamdyq bilim berý júıesimen tıimdi ıntegrasııa júrgizý arqyly dúnıe júzine Astananyń ǵylym men bilim ortalyǵy retinde kórsetilip kele jatqanyn atap ótti.
«Qazaqstannyń Úshinshi jańǵyrýy: jahandyq básekege qabilettilik» atty meniń Joldaýymdy oryndaýda ýnıversıtettiń atqarar róli óte zor. Ýnıversıtetti myńnan astam túlek tabysty támamdap shyqty. Bizdiń halqymyzda «Bilimniń basy – beınet, túbi – zeınet» degen ulaǵatty sóz bar. Oqý orny túpkilikti jańǵyrý jolyna túsken Táýelsiz Qazaqstanǵa aıanbaı qyzmet etedi dep senemin. Sol úshin osy ýnıversıtetti saldyq. Sol úshin sizderdi oqyttyq, dedi Nursultan Nazarbaev.
Memleket basshysy kóktemniń bul qýanyshty kúni jańa dıplom ıelerine, Nazarbaev ýnıversıtetiniń túlekterine maman retindegi kásibı jolynyń bastaýy retinde este qalatynyn atap ótti. Bıyl Nazarbaev ýnıversıtetin 737 túlek támamdady. Sonyń ishinde alǵash ret 9 doktorant daıarlandy. Buǵan deıingi jyldarda túlep ushqan myńdaǵan stýdentterdiń jartysy álemniń eń úzdik joǵary oqý oryndarynda oqýlaryn jalǵastyrǵanyn tilge tıek etken Elbasy túlekterdiń osy ýaqytta eńbek naryǵynda ózderiniń básekege qabiletti jáne suranysqa ıe mamandar ekenin dáleldegenderin erekshe atap ótti. Olar búginde elimizdegi eń iri ǵylymı mekemelerde, medısınalyq komanııalarda jáne memlekettik qyzmette eńbek etip júr.
Dýman ANASh,
«Egemen Qazaqstan»
