Komıssııa májilisi kezinde Prezıdent maqalasynan týyndaıtyn «Týǵan jer», «Qazaqstandaǵy 100 jańa esim», «Jańa gýmanıtarlyq bilim. Qazaq tilindegi 100 jańa oqýlyq», alfavıtimizdi qazirgi kırıllısadan latyn qarpine kóshirý jáne «Qazaqstannyń kıeli jerleriniń geografııasy» týraly baǵdarlamalar barysy talqylandy. Biz osynyń ishinde latyn qarpine kóshýge qatysty aıtylǵan oı-pikirlerge basymdyq bergimiz keledi. О́ıtkeni, bul másele maqalada kórsetilgen, ózge baǵyttarǵa qaraǵanda túsindirý jumystaryn kóbirek qajetsinetini aıtpasa da belgili.
Taǵy bir qoıylar talap − latyn alfavıtine kóshý jónindegi oılar men pikirler aldyn ala belgilengen tujyrymdamalyq qujattar aıasynan aspaǵany jón. О́kinishke qaraı, qazirgi kúni memleketimizdiń órkenıetti jolǵa bet burýynyń bir belgisi ispettes, bul másele tek fılolog mamandar men belgili bir lıngvıstıkalyq toptardyń arasynda ǵana talqylaý nysanyna aınalǵan. Al halyqtyń qalyń toby ázirge baǵdarlamalyq baǵytqa qatysty oı-pikirlerin ortaǵa salýdan tys qalyp otyr.
Osy olqylyqtyń ornyn toltyrý jóninde Aqtóbe oblysynda baıypty bastamalar paıda bola bastaǵany kóńildi demeıdi. Sonyń bir dáleli óńirdegi tusaýkeser saǵattary men latyn álipbıin meńgerýge qatysty aqysyz kýrstar uıymdastyrý jónindegi umtylystar bolyp tabylady. Aqtóbe oblystyq tilderdi damytý basqarmasynyń basshysy Gúláıim Tólebaeva óz oı-pikirin osy arnadan sabaqtady. Kelesi kezekte óz dáýirinde latyn álipbıin qoldaǵan tarıhı tulǵalardyń biri, qazaq til bilimi ǵylymynyń kórnekti ókili, osy óńirdiń týmasy Qudaıbergen Jubanov ekenin aıtpaı ketý shyndyqqa qııanat. Bir súısinerligi búgingi kúnge deıin júrgizilgen áleýmettik zertteýler men taldaýlardyń qorytyndylary Aqtóbeniń búgingi turǵyndarynyń 67 paıyzy latyn alfavıtine kóshýdiń qajettiligin qoldaǵanyn kórsetedi,− dedi budan ári gazet tilshisine Gúláıim Telmanqyzy.
Aldyńǵy oıymyzdy odan ári shegendep, shegeler tusta latyn álipbıine kóshý jumystarynyń elimizdiń rýhanı álemi úshin asa qajet is ekenin taıǵa tańba basqandaı túsindirip berýi úshin tıisti kadrlar korpýsy ázirlenip jasaqtalýy kerektigi de basy ashyq másele. Bul turǵyda Qudaıbergen Jubanov atyndaǵy Aqtóbe óńirlik ýnıversıtetiniń rektory Baýyrjan Erdembekov qazirgi kúnniń ózinde «Qazyna» ǵylymı-zertteý ortalyǵy qurylǵanyn alǵa tartty. Onyń aıtýynsha, joǵary oqý ornynda latyn qarpine kóshý máselelerine baılanysty kópshiliktiń saýaldaryna saýatty da tujyrymdy jaýaptar qaıtara alatyn lektorlar tobyn ázirleýge de nazar aýdaryla bastaǵan.
Temir QUSAIYN,
«Egemen Qazaqstan»
AQTО́BE
