Qazaqstan fýtbol federasııasynyń prezıdenti Seıilda Baıshaqov 10 maýsym kúni Almaty Ortalyq stadıonynda ótetin fýtboldan 2018 jylǵy Álem Chempıonatynyń irikteý týrnırindegi Qazaqstan men Danııa quramalary arasyndaǵy mańyzdy kezdesýge jankúıerlerdi shaqyrdy.
«Bizdiń fýtbolshylar ÁCh-2018 irikteý kezeńinde óz alańynda Rýmynııa jáne Polsha quramalaryn qabyldap, laıyqty qarsylyq kórsetti. Qazaqstanǵa kelgen kez kelgen eýropalyq qarsylas bizdiń quramadan qaımyǵatyny anyq. О́ıtkeni, Qazaqstan quramasynda aýa-raıynyń ystyǵy men sýyǵyna qaramastan, únemi qoldaý kórsetetin naǵyz jankúıerleri bar!
Danııa quramasynyń áleýetin barsha álem biledi. Onyń quramynda Krıstıan Erıksen, Kasper Shmeıhel, Sımon Kıaer, Kasper Dolberg, Rıza Dýrmısı jáne basqa da myqty oıynshylar bar.
Barlyq fýtbol jankúıerlerin 10 maýsym kúni Almatynyń Ortalyq stadıonynda ótetin Qazaqstan men Danııa quramalarynyń arasyndaǵy oıynǵa shaqyramyn. Bizdiń quramaǵa qoldaý kórsetińizder!» deıdi QFF prezıdenti Seıilda Baıshaqov.
