Reseı prezıdenti Dmıtrıı Medvedev eldiń qorǵanys pen qaýipsizdikke arnalǵan shyǵyny óte joǵary bolyp qala beretinin málimdedi. Mundaı ustanymmen kelispeıtin memlekettik qyzmetshiler, dedi ol, ózderine basqa jumys izdeı bersin.
Italııa premer-mınıstri Sılvıo Berlýskonıge qatysty onyń bıznesmen Djampaolo Tarantınıdi óziniń jeńgetaılyq isi boıynsha tergeýge jalǵan málimet berýge májbúrledi degen kúdik paıda bolyp otyr. Bul týraly ANSA agenttigi habarlady.
Avstralııa úkimeti áıelderge tikeleı soǵys is-qımyldaryna qatysty laýazymdarda qyzmet etýge ruqsat beretin sheshim qabyldady. Biraq ol úshin názik jandylar erler normatıvterin oryndaýǵa qabiletti bolýlary tıis kórinedi.
Máskeýdegi Pýshkın alańynda oppozısıonerler Reseı premer-mınıstri Vladımır Pýtınniń prezıdenttik saılaýǵa túsýine qarsy narazylyq aksııasyn ótkizdi. Mıtıng Máskeý bıligimen kelisilip uıymdastyryldy. Sharaǵa birneshe júz adam jınaldy.
«Ál-Jazıra» telearnasy Kabýl bıýrosynyń basshysy Samer Allavı dúısenbi kúni HAMAS qozǵalysymen yntymaqtastyqta Izraılge qarsy jasaǵan qylmysy úshin sotqa tartyldy. Ol mundaı áreketpen 1993 jyldan beri aınalysyp kelipti.
Amerıkanyń Kýbaǵa qarsy ekonomıkalyq tosqaýyly aral memleketke trıllıon dollarǵa jýyq shyǵyn ákelgen. Bulaı dep Kýba syrtqy ister mınıstri Brýno Rodrıges Parılıý jarııa etip otyr. Embargo rejimin Vashıngton 1960 jyly engizgen bolatyn.
Alekseı Kýdrın Reseı Federasııasy vıse-premeri jáne qarjy mınıstri qyzmetinen otstavkaǵa ketti. Kýdrınniń otstavkasy týraly jarlyqqa prezıdent Medvedevtiń qol qoıǵanyn onyń baspasóz hatshysy N.Tımakova qýattap otyr. Kýdrınniń buǵan deıin Medvedev úkimetinde istemeımin dep málimdegeni belgili.
Grýzınniń «Rýstavı-2» telearnasynyń jýrnalısteri Grýzııa parlamentiniń burynǵy spıkeri Nıno Býrdjanadzeniń Tbılısıde prezıdentke qarsy aksııalar uıymdastyrǵany úshin syrttaı sottalǵan kúıeýi Badrı Bısadze Venada júr degen habar taratty.
Germanııa Lıvııanyń astanasy – Trıpolıde elshilik ashty. Elshilik qyzmetke Raınar Eberle taǵaıyndalǵan. Onyń aıtýynsha, elshiliktiń mindeti Jańa Lıvııamen saıası, ekonomıkalyq jáne mádenı baılanystar ornatý bolyp tabylady.
Estonııanyń astanasy – Tallın qalasynyń meri Edgar Savısaar kóliginiń jyldamdyǵyn asa joǵarylatyp jibergeni úshin aıtypty dep tanyldy. Ol saǵatyna 90 shaqyrym jyldamdyqpen júrýge ruqsat etilgen jol boıynda 137 shaqyrym jyldamdyqpen júrgen. Endi mer aıyp tóleýi, tutqyndalýy nemese 12 aıǵa kólik júrgizý quqynan aıyrylýy tıis.
Aqparat agenttikteriniń materıaldary negizinde ázirlendi.
