Jumystyń birinshi kezeńinde eriktilerdi shet tilderin biletin stýdentterden jasaqtaý sharalary júrgizildi. Olardyń qatarynda: S.Seıfýllın atyndaǵy qazaq agrotehnıkalyq ýnıversıteti, L.N.Gýmılev atyndaǵy EUÝ, Qazaq GZÝ, qazaq-túrik lıseıi, sonymen qatar №22 mektep-gımnazııasynyń oqýshylary men qala turǵyndary bar. Eriktilerdiń jalpy sany 1500-den asady.
L.N.Gýmılev atyndaǵy EUÝ bazasynda sáýir aıynan bastan shtab pen call-center jumys isteýde. Shtab músheleri jumys josparyn bekitti jáne EKSPO-2017 eriktilerine jadynamalar men tujyrymdama daıyndady. Stýdentter men oqytýshylardan quralǵan eriktilerdiń sýpervaızery taǵaıyndaldy. Eriktilerdiń etıka Kodeksi ári ádistemelik járdemaqy quryldy. Ár eriktimen jazbasha azamattyq-quqyqtyq kelisim shart jasaldy.
Qala ákimdiginiń qurylymdyq bólimshelerimen birlese otyryp eriktilerdiń jumys isteıtin oryndary belgilendi: halyqaralyq áýejaı, temirjol vokzaly, avtovokazl, jedel mamandandyrylǵan qyzmetter (101, 102, 103, 911), mádenı nysandar men konaqúıler jáne t.b.
- Bizdiń barlyq eriktiler, ıaǵnı 1500 adam Astana q. «NIKA» kommýnıkatıvti damytý ortalyǵynyń» sertıfıkattalǵan jattyqtyrýshylary men dáris oqýshylarynyń tolyq oqýynan ótti. Olarǵa sheteldik qonaqtarmen sóılesýdiń ádisteri úıretildi, eriktiler qozǵalysynyń qyr-syry tanystyrylyp, Astana qalasy men EKSPO tarıhy jaıly, sonymen qatar Elordanyń kórikti jerleri týraly aqparattar berildi, - deıdi «Astana qalasynyń jastar saıasaty máseleleri basqarmasy» MM basshysy Ashat Oralov.
Sonymen qatar, ekonomıka, zań, psıhologııa jáne pedagogıka salalary boıynsha joǵary tájirıbeli mamandar eriktilerge 16 saǵattyq oqytýlar júrgizdi.
«Arman» otbasylyq jáne medısınalyq quqyq bıýrosy» lısenzııalanǵan jattyqtyrýshylary, TJ Komıtetiniń azamattyq qorǵanys basqarmasynyń jáne jastar saıasaty máseleleri basqarmasynyń da ókilderi eriktilerdi oqytyp, úıretti.
Eriktilerdi kerek-jaraqtarmen jabdyqtaý, sondaı-aq, kúndiz jáne túnde bir rettik tamaqtandyrý boıynsha jeke kompanııalarmen kelisim shart jasaldy. «Astana LRT» kompanııasy barlyq eriktilerdiń qoǵamdyq kólikterde (Astana qalasyndaǵy avtobýstar) kórme kezinde, ıaǵnı 3 aı boıy tegin qatynaýlaryna múmkindik jasady. Tez tamaqtanatyn McDonald’s meıramhanasymen 10 maýsym men 10 qyrkúıek aralyǵynda kún saıyn 500 eriktini 46 000 (qyryq alty myń) kýpon arqyly tamaqtandyrý boıynsha kelisimge qol qoıyldy. Osy kýpondar arqyly eriktiler tegin tústenýge qol jetkizedi.
Eriktilerdi yntalandyrý maqsatynda keshendi sharalar qarastyrylýda. Naqtyraq aıtsaq, eń úzdik volonter-stýdentterge Astana qalasy ákiminiń 20 bilim granty (bir jylǵy oqýǵa) bólinedi. Qala ákiminiń alǵys hattary, syılyqtar, estelik kádesyılar, elektrondy kitaptar, qalada ótkiziletin konsertterge tegin bıletter taratylady, kerek-jaraqtarmen qamatamasyz etiledi (jeńil jeıde, beısbolka, arqaǵa asatyn sómkeler men termos), qoǵamdyq kólikterge jol júrý bıletteri beriledi ári 3- 4 kýrs stýdentterine bir jylǵy jataqana qarastyrylady.
