Teńiz jaǵasyndaǵy sahnada mereke bastalmastan buryn-aq patrıottyq baǵyttaǵy saz oınap, jurtshylyqtyń kóńilin áserli kúıge bóledi. Rámizder alańynan baıkerlerdiń júrip ótýimen bastalǵan forým teńiz jaǵasynda jalǵasty. Forýmǵa baıkerler men velosıpedshiler toptary, jas belsendiler men Aqtaý garnızonynyń áskerı qyzmetkerleri, etnomádenı birlestik ókilderi, jalpy bilim beretin mekemeler oqýshylary men muǵalimderi, stýdentter, densaýlyq saqtaý salasy qyzmetkerleri, sportshylar, kásiporyndar jumysshylary, memlekettik qyzmetkerler men saıası partııalar belsendileri, qoǵamdyq uıymdar ókilderinen quralǵan 4 myńnan astam adam qatysty.
Shara «Týym – namysym, uranym – birlik, rámizderim – maqtanyshym» atty teatrlandyrylǵan prologpen bastaldy. Áskerıler qurmetpen rámizderdi, ıaǵnı Tý men Eltańbany alyp ótti. Teńiz jaǵasyndaǵy myńdaǵan adam Ánurandy áýelete shyrqasa, ónerpazdar men áskerıler «Qazaqstan» flesh-mobyn ótkizdi.
26 jyl buryn biz egemendikke qol jetkizip, dúnıejúzine táýelsizdigimizdi pash ettik. Bul – ata-babalarymyzdyń armany, elimizdiń kópten kútken úmiti aqtalyp, azattyqtyń týyn jelbiretken qasıetti kún. Táýelsizdiktiń aq tańyn alǵash ret Elbasynyń Jarlyǵymen bekitken memleketimizdiń betke ustar bedeldi beınesi – rámizderimizben qarsy aldyq. Týǵan jerge degen otanshyldyq ıdeıasyn qalyptastyryp, birligimiz ben yntymaǵymyzdy nyǵaıtatyn memlekettik rámizderdiń mereıli merekesin jyl saıyn atap ótý dástúrge aınaldy. Memleket basshysy Nursultan Ábishuly Nazarbaev «Memlekettik rámizder – halqymyzdyń rýhyn, ulttyq salt-sanasyn, qaharmandyǵy men danalyǵyn, bolashaqqa úmitin, arman-tilegin jetkizetin erekshe qundy belgiler», degen bolatyn.
Otan – ystyq uıa, qasıetti meken. Sondyqtan da ony qasterlep, árbir qazaqstandyq maqtan etedi. О́ıtkeni, Eltańbamyz, Týymyz, Ánuranymyz – Qazaq eliniń bolmysyn, búgini men erteńin sabaqtastyryp, eldiń eńsesin kóteretin eldigimizdiń eń basty abyroıy.
Biz búginde táýelsizdigimizdi tuǵyryna qondyryp, Qazaqstan memleketin quryp álemdegi baqytty halyqtardyń biri boldyq. Zor eńbekpen, mańdaı termen kelgen baılyǵymyzdy qoldan shyǵaryp almaı, urpaqtan urpaqqa tabystaý – bizdiń adal paryzymyz, dedi Mańǵystaý oblysynyń ákimi E.Toǵjanov.
Mańǵystaýlyqtardy merekemen Mańǵystaý oblysynyń «Qurmetti azamaty» Q.Erejepov, medısına ǵylymdarynyń doktory, professor, Qazaqstannyń Eńbek Eri S.Aqsholaqov quttyqtap, eldiń amandyǵyna, zamanynyń tynyshtyǵyna, táýelsizdiktiń beriktigi men urpaqtyń baqytty bolýyna tilekterin arnady.
Forýmda óz qyzmetterinde azamattyq erlik kórsetken tulǵalarǵa oblys ákiminiń Alǵys hattary men Astana qalasynda ótetin EKSPO-2017 halyqaralyq kórmesiniń bıleti tabystaldy. Mundaı syı-sııapat ár sala boıynsha iriktelgen 22 adamǵa buıyrdy.
Kók teńiz jaǵasyn ádemi kórinis pen áserli sátke bólegen shara mańǵystaýlyqtardyń memlekettik rámizderge degen yqylasyn tanyta tústi.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
Sýretti túsirgen Serik MAIEMEROV
