Alaıda, elorda klýby eńse túsirmeı, senbi kúni 15-týr aıasynda ótken matchta «Atyraýdy» 4:0 esebimen jeńdi. Sóıtip, «temirjolshylar» «Qaıratpen» aradaǵy eki upaı aıyrmashylyǵyn saqtap qaldy. Bul jerde «Astananyń» bir oıyndy kem ótkizgenin de esepten shyǵarmaý kerek. Qalaı bolǵan kúnde de, chempıonattaǵy teketirestiń qaıta oralǵanyn aıtý kerek.
«Qaırat» bul týrda Qaraǵandynyń «Shahterin» qabyldap, úsh dop aıyrmasymen jeńiske jetti. Búgingi kúnde almatylyq klýb qarsylastar qaqpasyna goldy eń kóp soqqan komanda retinde kózge túsip tur. 17 oıynda 39 gol – jaman kórsetkish emes.
Bul eki kóshbasshy klýbtan «Ordabasy» da qalysar emes. Ońtústikqazaqstandyqtar ótken týrda «Tarazdyń» qaqpasyna jaýapsyz úsh gol soǵyp, mańyzdy úsh upaıdy qanjyǵaǵa baılady.
Bul týrda týrnır kestesiniń orta tusyndaǵy komandalar nátıjesiz oıyn kórsetti. Máselen, «Tobyl» men «Qaısar» jáne «Ertis» pen «Oqjetpes» arasyndaǵy matchtarda esep ashylmady.
Maýsymnyń 10-y kúni Qazaqstan Ulttyq quramasy álem chempıonatynyń irikteý kezeńi aıasynda Danııa komandasymen oınaıtyndyqtan, el birinshiliginde bir apta úzilis bolady.
Bul týrdaǵy tirkelgen nátıjeler mynadaı boldy:
«Tobyl» – «Qaısar» – 0:0 (0:0). «Astana» – «Atyraý» – 4:0 (1:0), Kabananga, 22 (1:0). Grahovas, 62 –penaltıden (2:0). Tvýması, 66 (3:0). Kabananga, 73 (4:0). «Ordabasy» – «Taraz» – 3:0 (2:0), Tuńǵyshbaev, 5 (1:0). Nurǵalıev, 13 (2:0). Gogýa, 86 (3:0). «Ertis» – «Oqjetpes» – 0:0 (0:0). «Qaırat» – «Shahter» – 4:1 (3:0), Goý, 1 (1:0). Islamhan, 36 (2:0). Goý, 38 (3:0). Turysbek, 82 (4:0). Stoıanovıch, 86 (4:1).
Surmergender saıysy:
Jerar Goý («Qaırat») – 13, Jýnıor Kabananga («Astana») – 11, Alekseı Shetkın («Tobyl») – 8.
Maýsymnyń 18-i kúni ótetin kelesi týrda komandalar mynadaı jup qurap, ózara kúsh synasady:
«Qaırat» – «Tobyl», «Qaısar» – «Ordabasy», «Taraz» – «Ertis», «Oqjetpes» – «Aqjaıyq», «Aqtóbe» – «Astana», «Shahter» – «Atyraý».
