Atalmysh festıvaldiń ótýine uıytqy bolyp otyrǵan mekeme Mádenıet jáne sport mınıstrliginiń jaýapty qyzmetkeri Anargúl Múbárakovanyń aıtýyna qaraǵanda, bul mádenı jobanyń mańyzy – túrki tektes halyqtardyń shyǵarmashylyq dástúrin nasıhattaý jáne túbi bir jurttardyń týyn kóterý arqyly týysqan óner qaıratkerleriniń basyn qosý.
Osy bir uly dala muragerleri óner kórsetetin konsertke – qazaqstandyq etno ansambl «Tıgrahaýd» jáne «Aldaspan» toby, ózbekstandyq óner qaıratkeri Kasım Abbosov jetekshilik etetin «Abbos», bashqurt baýyrlarymyzdyń «Arǵymaq» etno-rok toby, Vengrııanyń sygan mýzykalyq motıvine negizdelgen «Tilla Torok’s Band» tobynyń skrıpkashylary, tatarstandyq Talǵat Hasenov basqarǵan ulttyq-dástúrli saz ujymy, býrıattyń «Namgar» jáne «Shono», tájikstandyq «Avesto» toptary, qyzǵyzstandyq dástúrli ánshi Gúlzada Rysqulova, Taýly Altaıdyń qyryldaq kaıchylary (jyrshylary) Bolot Baıryshev pen Alekseı Chıchakov, ózimizdiń kómeı-jyrshy Edil Qusaıynov jáne tybalyq kómeıshi Radık Tıýlıýsh basqarǵan «Chalama» toby men 1996 jyly Murat Ertel negizin qalaǵan dab-mýzyka janrynyń nasıhatshysy túrkııalyq«Baba Zula» ujymy qatysady dep kútilýde.
Joǵarydaǵy óner ujymdary men mýzykalyq toptardyń qaı-qaısy da halyqaralyq deńgeıde óner kórsetip júrgen tanymal óner tarlandary. Bulardyń basqa kásibı mýzykanttardan aıyrmashylyǵy – ózderiniń baıyrǵy babalar murasyn qaıta tiriltip, ony qazirgi zamanaýı mýzykalyq stıl – djaz, rok pen fank qospasy arqyly baıyta bilýinde.
Bul óner ujymdary qatarynan bes kún keshki saǵat 17.00-den bastap «Etnoaýyl» qalashyǵynda ornalasqan 850 oryndyq etnomıýzıkl zalynda konsert beredi.
«Álemge aty máshhúr EKSPO kórmesi kezinde elordada uly dalanyń dástúrli mýzykalyq festıvaliniń ótýi merekelik atmosferanyń jandanýyna úlken úles qosady», deıdi sharany uıymdastyrýshylar.
Sýretterde: Qazaqstandyq etno ansambl «Tıgrahaýd»; tybalyq kómeıshi Radık Tıýlıýsh; qyrǵyzstandyq dástúrli ánshi Gúlzada Rysqulova; bashqurtstandyq «Arǵymaq» toby; ózbekstandyq «Abbos» toby
Beken Qaıratuly,
«Egemen Qazaqstan»
