Qasıetti Quran kitapshasy ótken ǵasyrdyń elýinshi-alpysynshy jyldary belgili tarıhshy, ólketanýshy Anatolıı Popovtyń dosyna tıesili bolypty. Al Anatolıı Pavlovıchtiń ózi kezinde Jambyl oblystyq tarıhı-ólketaný mýzeıinde qyzmet atqarǵan azamat retinde Áýlıeata óńirine jaqsy tanymal. Qasıetti Quran kitabyn oqýǵa, ustaýǵa tyıym salynǵan tusta da Popovtyń dosy bul kitapshany jasyryp saqtaıdy. Keıinnen taǵdyrdyń jazýymen bul kitapsha Anatolıı Popovtyń qolyna túsken. Al mýzeı qyzmetkeri Móldir Qyzdarbekovanyń aıtýynsha, bul jádiger qorǵa 2000 jyly ótkizilgen. Arab áripterimen jazylǵan qundy jádiger mýzeı minberin ımandylyq ıirimine bólep tur deýge bolady.
Kitapshanyń kóptiń qyzyǵýshylyǵyn týdyryp tur deıtin sebebimiz de bar. Osy ýaqytqa deıin shaǵyn ǵana metall qorapta saqtalyp kelgen kitapshanyń bıiktigi – 2,5, al eni 1,7 santımetr ǵana. Biraq talaı ýaqyt boıy saqtalyp kelgen qymbat qazyna óńir mádenıeti úshin de aıtýly qundylyq bolyp tur. Al kitapsha saqtalǵan qorapshanyń túsi aqshyl-sary tústes, al betinde ósimdik tárizdi oıý-órnekter bar.
Hamıt ESAMAN,
«Egemen Qazaqstan»
Jambyl oblysy
