Lırıkaǵa toly tereń mazmunymen tyńdaýshyny úıirip áketetin Chaıkovskıı mýzykalary adam ómiri, bostandyq, baqyt úshin kúres jyrlanýy sebepti de úlken qurmetke ıe bolsa kerek. Jyl ótken saıyn mýzykant shyǵarmalaryn nasıhattaýda erekshe mánge ıe festıval kókjıegi keńip, álemdik deńgeıde bedeli kúsheıip keledi. Dúnıeniń tórt tarabynan saıysqa qatysam degen úmitkerlerdiń sany kóbeıdi. Bıylǵy báıgede 20 memleketten kelgen 120-dan astam talant ıeleri baq synady. Olardyń barlyǵy óz elderinde shashasyna shań juqtyrmaǵan júırik órender. Klassıkalyq mýzykaǵa jan-tánimen berilgen talantty jas pıanıster, skrıpkashylar jáne vıolonchelıster úshin bul baıqaýdyń mańyzy zor.
P.I.Chaıkovskıı atyndaǵy Halyqaralyq konkýrs laýreattar qaýymdastyǵynyń bas dırektory Andreı Sherbak baıqaýdyń klassıkalyq mýzyka áleminde aıtýly orny bar ekenin atap ótti.
– О́nerpaz jas talanttarymyz úshin osyndaı saltanatty kesh uıymdastyrylyp otyr. Úmitterin úkilep júgirip júrgen ata-analarǵa, ustazdar qaýymyna eki ese alǵys aıtamyn. Konkýrs shyn máninde óte joǵary deńgeıde ótti, – deıdi Andreı Mıhaılovıch.
«Vıolonchel» atalymy boıynsha Io Kıtamýra (Japonııa), «skrıpka» atalymy boıynsha Neıkýng Kan (Koreıa), «fortepıano» atalymy boıynsha Kaıl Hý (AQSh) bas júldege ıe boldy. Laýreattardy quttyqtaǵan Qazaq ulttyq óner ýnıversıtetiniń rektory Aıman Musaqojaeva halyqaralyq festıvaldi zamanaýı mádenıet klasterlerin damytýǵa baǵyttalǵan aýqymdy joba dep atady.
– Qazir elimizde tórtkúl dúnıeni tańqaldyrǵan EKSPO-2017 kórmesi ótip jatyr. Bolashaqtyń energııasy degen ol – bizdiń osy otyrǵan talantty ul-qyzdarymyz. EKSPO kórmesi aıasynda qalanyń eń kórikti jerinde mýzyka únin asqaqtatyp, mýzyka merekesine aınaldyrǵandaryńyz úshin qýanyshym sheksiz. О́ner – máńgilik. Birge qýanyp, birge tolqydyq, – deıdi Aıman Musaqojaeva.
Aıa О́MIRTAI
«Egemen Qazaqstan»
