Árıne, bulardyń bári de baldyrǵandardy tıisti tólemaqylar, tipti birqatar jaǵdaılarda joǵary baǵa boıynsha qabyldaıdy. Al Aqtóbe qalasyndaǵy «Aslan-Alı» JShS jetekshileri Mártók aýdanyndaǵy Aqqudyq aýyldyq okrýgine qarasty Dostyq aýylynan tegin balabaqsha ashý jóninde uıǵarym jasady.
«Qazirgi kezde balabaqsha ǵımaraty retinde jalǵa alynǵan dańǵaradaı bes bólmeli úıdiń kúrdeli jóndeý jumystary aıaqtalyp keledi. Jıhazdarǵa tapsyrys jasalǵan. Balabaqsha paıdalanýǵa berilgen kezde oǵan osy aýyldyń adamdary qyzmetke tartylmaq. Ǵımarat bala sanyna tarlyq etken jaǵdaıda, qosymsha alań qosýǵa múmkindikter bar», deıdi seriktestik menedjeri Saıat Ońaıbaev.
Al balabaqsha meńgerýshisi Álııa Bıtýrınanyń aıtýynsha, Dostyq aýylynda 40-qa jýyq mektep jasyna deıingi bala bar. Tipti, kúndelikti tirshiligin qolyndaǵy azyn-aýlaq malmen aıyryp otyrǵan keıbir qarapaıym otbasy ıeleri balabaqshaǵa 2-3 balasyn qatar berýine týra kelmek. Osyndaı jaǵdaıda olar aqysyz balabaqsha ashý jóninde sheshim qabyldaǵan aqtóbelik kásipkerge dán rıza.
Temir QUSAIYN,
«Egemen Qazaqstan»
Aqtóbe oblysy,
Mártók aýdany
