Vıse-mınıstrdiń sózine qaraǵanda, 2017 jyldyń 1 shildesindegi jaǵdaı boıynsha jumyspen qamtý oryndarynda jumyssyz retinde 151,7 myń adam tirkelgen. «Baǵdarlamanyń tehnıkalyq-kásibı bilimmen jáne qysqa merzimdegi kásibı oqýmen qamtamasyz etý kózdelgen alǵashqy baǵyty aıasynda bıyl tehnıkalyq ári kásibı bilimi bar 21,3 myń kadr daıarlaý jáne de 70,3 myń qazaqstandyqty qysqa aralyqta kásibı oqytý josparlanyp otyr. Oqý sabaqtary búginde qajettilikke ıe kásipter boıynsha qolǵa alynýda.
1 shildedegi derekke súıensek, 21 127 adam qysqa merzimdi oqýǵa jiberildi», dep atap ótti B.Nurymbetov.
Sonymen qatar, kóship-qonýshylardyń máselesine mán berip, olardyń kóship- qonýy erikti bolýy kerektigin alǵa tartty. Byltyr Soltústik Qazaqstanǵa qonys aýdarǵan 1-2 otbasynyń qaıtadan kóshýine týra kelgen. «Birinshiden, adamnyń kóship-qonýy óz qalaýymen júzege asýy kerek. Memleket eshkimdi májbúrlemeıdi. Sebebi, bul – konstıtýsııalyq quqyq. Ekinshiden, kóshemin degen azamatty yntalandyrý kerek. Ol sol aımaqqa qyzyǵýshylyqpen barýy qajet. Biz olarǵa úı alyp beremiz, jaǵdaıyńdy jasap beremiz dep úmittendirmeýimiz kerek. Memleket eshkimge bara salyp, úı ápermeıdi. Sebebi, elimizde turǵyn úımen qamtamasyz etýde biryńǵaı saıasat qalyptasqan. Al kóship jatqandarǵa biz turǵyn úılik nesıeniń jeńildetilgen túrlerin nemese jalǵa alǵan úıdiń shyǵyndaryn óteý sııaqty quraldardy qarastyryp jatyrmyz», dedi vıse-mınıstr.
Sonymen qatar, B.Nurymbetov 5 jyldyń ishinde 59 myń otbasyn kóshirý kózdelip otyrǵanyn tilge tıek etti. «Biz olardy kóshirýdi 2018 jyldan bastap ketsek deımiz. Qazir sonyń barlyq tetikterin qarastyryp jatyrmyz», dedi ol.
Raýan QAIDAR,
«Egemen Qazaqstan»
