Foto: QTJ
Eń aldymen, poıyzǵa miný úshin jaramdy bılet bolýy shart. Bıletsiz júrýge jol berilmeıdi. Tekserý kezinde jol júrý qujaty bolmaǵan jolaýshy kelesi stansııada túsirilýi múmkin.
Sol sııaqty balalardyńjeke basyn kýálandyratyn nemese ata-anasymen týystyǵyn rastaıtyn qujatsyz alyp júrýge ruqsat joq. Qujattar bolmaǵan jaǵdaıda balany poıyzǵa otyrǵyzý múmkin emes.
25% jáne 33% jeńildik: Zeınetkerler men jastar úshin poıyz bıleti arzandaıdy
Kompanııa jolaýshylarǵa bir adamǵa belgilengen 35 keliden artyq júkti aldyn ala tólem jasap, tıisti qujat rásimdelgen jaǵdaıda ǵana tasymaldaı alatynan eske salady. Al veterınarııalyq qujattary joq janýarlardy poıyzben alyp júrýge qatań tyıym salynady.
Poıyz ishinde shylym jáne elektrondy temeki shegýge bolmaıdy. Sondaı-aq tótenshe jaǵdaı bolmasa, stop-krandy basýǵa ruqsat etilmeıdi. Mundaı áreket qozǵalys kestesin buzyp qana qoımaı, ákimshilik jaýapkershilikke ákelýi múmkin.
Esirtki, jarylǵysh jáne ótkir zattardy tasymaldaýǵa múlde jol berilmeıdi. Zańǵa qaıshy áreket anyqtalǵan jaǵdaıda jolaýshy quqyq qorǵaý organdaryna tapsyrylady. Budan bólek, agressııa tanytýǵa, janjal shyǵarýǵa, ózge jolaýshylardy qorlaýǵa qatań tyıym salynady. Tártip buzǵan azamattar jaqyn mańdaǵy stansııada túsirilýi yqtımal.
Poıyz qozǵalysy kezinde vagonnan túsý – ómirge asa qaýipti áreket. Túsý tek stansııalarda jáne arnaıy esikter arqyly júzege asyrylady. Vagon múlkin búldirý, ishin lastaý, vandalızm kórinisteri de jaýapkershilikke ákeledi.
Alkogoldik ishimdikterdi poıyz vagondarynda tutynýǵa bolmaıdy. Bul talap meıramhana-vagondarǵa qatysty emes, onda ishimdik belgilengen tártipke saı usynylady. Shekteýdi buzý ákimshilik jazaǵa jáne poıyzdan túsirýge negiz bolýy múmkin.
Qyzmet kórsetý sapasyna qatysty suraqtar týyndaǵan jaǵdaıda jolaýshylar WhatsApp arqyly +7 776 714 5686 nómirine jazyp, vagon ishindegi QR-kodty skanerlep nemese 1433 tegin anyqtama qyzmetine qońyraý shala alady.
Atalǵan talaptar «Temirjol kóligimen jolaýshylar, bagaj jáne júk-bagajdy tasymaldaý qaǵıdalaryna» sáıkes bekitilgen. Kompanııa jolaýshylardy tártipti saqtaýǵa shaqyra otyryp, qaýipsiz sapar mádenıetin qalyptastyrýǵa úndeıdi.
Aqtóbe oblysynda jolda qalyp qoıǵan 400 jolaýshy poıyzben tegin jetkizildi
