Obaly neshik, elordanyń fýtbolshylary «Seltık Park» stadıonyna jıylǵan 50 myńnan astam kórermenniń esti shyǵarǵan qıqýyna qaramastan, matchtyń 30-mınýtyna deıin alań ıelerimen terezesi teń oınady. Tipti, qaqpaǵa qaraı baǵyttalǵan dop sany jaǵynan da basymdyq bilinbedi. Biraq, «Astananyń» qaýqary osyǵan ǵana jetken edi. Matchtyń 32-mınýtynda «Seltıktiń» jartylaı qorǵaýshysy Rogıchtiń oń qanattan tepken dobyn keri qaıtaramyn degen Evgenıı Postnıkov óz qaqpasyna týra baǵyttady. Mine, osydan keıin-aq «Astananyń» qorǵanysy kóbesinen sógildi de júre berdi.
Arada on mınýttaı ýaqyt ótkende taıaýda ǵana elorda klýbynyń qataryna qosylǵan legıoner Laslo Klıaınhaıslerdiń óreskel qateligin sheber paıdalanǵan Skott Sınkler qaqpashy Mokındi qapy qaldyrdy. Sóıtip, birinshi taım bitkende tablodaǵy esep 2:0 bolyp janyp turdy...
Úzilisten keıin alań ıeleri shabýyldy ústi-ústine údete tústi. «Astana» bolsa, abdyrap qalǵan. Beı-bereket júgiris, oıynshylar arasyndaǵy baılanystyń názik jibi byrt-byrt úzilgen. Myqty qarsylastyń mysy bassa kerek, bizdiń fýtbolshylar aıaqtaryn matap tastaǵandaı sharasyz kúıge tústi de qaldy...
Kóp uzamaı Sınkler óziniń osy oıyndaǵy ekinshi golyn soqty. Basqa bolsa osy eseptiń ózine toqmeıilsip, bosqa ter tókpes te me edi? Biraq, «Seltık» jalpaqshesheı klýb emes. Tablodaǵy esep 3:0 bolyp tursa da órshelene alǵa umtyldy. Sondaǵysy – qarymta matchta qarsylyq kórsetýge qaýqary qalmasyn degen qareket qoı!
Alańda tolyǵymen ústemdik qurǵan «Seltık» aıasyn ba, sol arynmen baryp taǵy da eki gol soqty. Bul joly kelttikter sapynan Forrest (79) mergendigimen kózge tússe, matchtyń 88-mınýtynda Grıffıtstiń tepken doby Igor Shıtovtiń aıaǵyna tıip baryp qaqpaǵa endi de, besinshi gol retinde hattamaǵa jazyldy.
Qaqpasyna bes birdeı gol jibergen qaqpashyda qandaı qadir bolsyn. Saly sýǵa ketken Aleksandr Mokınnen ótken muńdy adam joq edi bul kúni. Múmkin, osydan tórt jyl buryn, osy «Seltık Parkte» qaqpasyna úsh gol jibergeni de esine tústi me eken, kim bilsin? Ol kezde Mokın «Shahterdiń» qaqpasyn qorǵaǵan edi...
Nesin aıtasyz, «Seltıkpen» oıynda bizdiń fýtbolshylardyń básekege qabiletti emestigi kózge shuqyǵandaı kórinip turdy. Stanımır Stoılov «qyryq úsh kún kemdiktiń» qyry men syryn tabýǵa tyrysar-aq. Biraq, bári de kesh sııaqty. Qarymta matchta kelttikterdiń qaqpasyna bes nemese alty gol soǵý degenińiz... ol bir qııal-ǵajaıyptyń áńgimesi. Al endi, PSJ-dan 0:4 bolyp jeńilip, qarymta oıynda 6:1 qylyp jeńgen «Barselonanyń» byltyrǵy erligin qaıtalasa, onda «Astanaǵa» altynnan eskertkish turǵyzý kerek shyǵar...
Qarymta match tamyzdyń 22-si kúni «Astana Arenada» ótedi. Eki oıyn qorytyndysynda jeńiske jetken klýb ÝEFA Chempıondar lıgasynyń toptyq kezeńine joldama alsa, jeńilgen ujym óz baǵyn Eýropa lıgasynda synaıtyn bolady.
16 tamyz. Glazgo. «Seltık Park» stadıony. 54016 kórermen.
Tóreshi – Ovıdıý Alın Hesegan (Rýmynııa).
«SELTIK» – «ASTANA» – 5:0 (2:0)
Evgenıı Postnıkov, 32 – óz qaqpasyna (1:0). Skott Sınkler, 42 (2:0). Skott Sınkler, 60 (3:0). Djeıms Forrest, 79 (4:0). Igor Shıtov, 88 – óz qaqpasyna (5:0).
«Seltık»: Gordon, Tırnı, Shımýnovıch, Bıtton, Lýstıg, Ncham, Braýn, Sınkler, Rogıch (Makgregor, 63), Forrest (Armstrong, 82), Grıffıts.
«Astana»: Mokın, Shomko, Logvınenko (Beısebekov, 66), Postnıkov, Shıtov, Maevskıı, Klıaınhaısler, Mýjıkov (Grahovas 82), Tomasov (Murtazaev, 77), Tvýması, Kabananga.
Qaırat ÁBILDA,
«Egemen Qazaqstan»
