Qazaqstandyq kásipqoı boksshy qyz Fırýza Sharıpova Astanada bolgar qyzy Mılena Kolevany jeńip, eki birdeı chempıondyq ataqqa qol jetkizdi.
Birinshi raýndtan bastap Fırýza qarsylasyn buryshtan-buryshqa tyqsyryp, belsendiligin baıqatty. Bolgar qyzy qorǵanysta judyryqtasyp, sáti túskende ǵana shabýyldaýmen boldy. Raýnd saıyn qarqynyn arttyra túsken otandasymyz dóp soqqylarymen alǵa oza tústi. Mılena Koleva da tájirıbeli ekenin baıqatty. Eki birdeı chempıondyq ataq sarapqa salynatyn jekpe-jekke daıyndalyp kelgeni baıqaldy.
Fırýza 8 raýnd boıy soqqy jasap baqqanmen, Mılena jekpe-jek sońyna deıin shydap baqty. Degenmen kezdesýde otandasymyz aıqyn basymdyǵyn tanytty. Tóreshilerdiń barlyǵy Fırýzany jeńimpaz retinde tanydy. Mılena Kolevany jeńgen Fırýza Sharıpova WIBA jáne WBU nusqalary boıynsha chempıondyq ataqqa qol jetkizdi.
- Meni qoldaýǵa kelgen barshalaryńyzǵa alǵysymdy bildiremin. Jattyqtyrýshylarym men ata-anama raqmetimdi aıtamyn. Bul jeńiske úlken eńbektiń arqasynda qol jetkizdik. Komandama raqmet. Alǵa, Qazaqstan, - dedi boksshy.
