Qatysýshylar jýyrda ǵana Qazaqstan, Reseı, Armenııa, Belorýs pen Qyrǵyzstannyń joǵarǵy oqý oryndary bazasynda qurylǵan Memleketaralyq jelilik qarjy ınstıtýtynyń qyzmeti týraly sóz qozǵap, jelilik bilim berýdiń artyqshylyqtary týraly sóz qozǵady. Jıyndy Memleketaralyq jelilik qarjy ınstıtýt prezıdenti Natalıa Korjova júrgizip otyrdy. Ol óz sózinde Eýrazııalyq ekonomıkalyq odaq aıasynda biryńǵaı biliktilik talaptaryn engizý qajettigine erekshe toqtaldy. Málimdeýinshe, ıntegrasııalyq baılanysty arttyrý úshin bilikti qarjygerlerdi oqytyp, ortaq eńbek naryǵyna beıimdeý kerek. Bul maqsatta elimizdegi qarjy akademııasy sekildi Reseı, Qyrǵyzstan, Armenııa jáne Belarýs memleketterindegi maman daıarlaıtyn 6 oqý orny bir júıege biriktirilgen. Onyń ishinde Reseı Úkimeti janyndaǵy qarjy ınstıtýty, Sankt-Peterbýrg qarjy ekonomıkalyq ınstıtýty, Belarýs ekonomıkalyq qarjy ınstıtýty, Reseı-Armıan jáne Qyrǵyz-Slavıan qarjy ýnıversıtetteri bar. Sondaı-aq. Qazaqstannyń Qarjy mınıstrliginiń Qarjy akademııasy da osy quramǵa kirdi. Mundaı birlesken jumystyń maqsaty EEO elderine básekege sáıkes maman daıarlaý, sertıfıkattaý, biliktiligin moıyndaýǵa arnaldy.
Sessııa otyrysynda EAEO elderiniń memlekettik mekemeleri men kvazımemlekettik sektorlaryna qarjy mamandaryn daıarlaý máselesine erekshe mán berildi. Aıtalyq, Bilim salasyndaǵy ıntegrasııanyń órisin keńeıtý jumysyn tilge tıek etken Qazaqstan Respýblıkasy Bilim jáne ǵylym mınıstrliginiń jaýapty hatshysy Aryn О́rsarıev Qazaqstan tarapy izgi bastamalarǵa daıyn ekenin atap ótti.
«Qazaqstan úshin bilim berý salasyndaǵy ıntegrasııa men ishki ıntegrasııanyń naqty bastamalary óte mańyzdy. Bilim berý salasy – bizdiń eýrazııalyq ıntegrasııadaǵy eń ozyq baǵyttardyń biri. 90-shy jyldardan beri bizdiń bilim berý mekemelerimizdiń arasyndaǵy qarym-qatynas joǵary deńgeıde nyǵaıyp keledi. О́tken jyldyń sáýirinde Máskeýde Halyqaralyq jelilik ýnıversıtet qurý týraly memorandýmǵa qol qoıyldy. Qazirgi tańda Qazaqstan ozyq tájirıbeler men bilim berý ınnovasııalarynyń elderdiń damýyna járdemdesýine múddelilik tanytyp otyr. Qazaqstannyń 50-den astam joǵary oqý oryndarynda EAEO-nyń joǵary oqý oryndarymen birge qosdıplomdy baǵdarlamasy bar», dedi A.О́rsarıev. Aıtýynsha, Qazaqstan jyl saıyn sheteldik bilikti mamandardy tartý úshin tek qana joǵary oqý oryndarynyń resýrstaryn ǵana emes, memleketten de qarajat bóledi. Ol baǵyttaǵy jumys qazaqstandyq bilim berý sapasyn arttyrýǵa zor úlesin qosyp keledi. «Elimizdiń 9 ýnıversıteti QS reıtıngine endi. Bıylǵy jyly Qazaqstannyń bazasy negizinde Ortalyq Azııa bilim berý haby qurylǵanyn jarııaladyq. Biz Qazaqstan eýrazııalyq keńistik sheńberinde bilim berý qyzmetterin kórsetý salasynda básekege qabiletti bolýyn qalaımyz», dedi A.О́rsarıev.
Jıynda sondaı-aq, «Sberbank» KAQ basqarma tóraǵasynyń keńesshisi Elena Teplıskaıa, «Qarjy akademııasy» AQ rektory Gúlzada Shakýlıkova, Qyrǵyz Respýblıkasy saýda ónerkásiptik palatasy memlekettik-jekemenshik áriptestigi jáne Infraqurylymdy damytý, eksportqa járdem, ónerkásiptik saıasat jónindegi komıtet tóraǵasy Qýatbek Rahımov, Reseı Federasııasy Kólik mınıstriniń orynbasary keńesshisi Iýlııa Zvorykına, qazaqstandyq «Talap» qoldanbaly zertteýler ortalyǵynyń dırektory Raqym Oshaqbaev, «Eýrazııa álemi» qoǵamdyq orynyń prezıdenti Edýard Poletaev, Eýrazııalyq ekonomıkalyq komıssııa alqasy tóraǵasynyń kómekshisi Iýlııa Chalaıa jáne taǵy basqalar sóz sóılep, ıntegrasııalyq bilim máselesindegi oılaryn ortaǵa saldy.
Dınara BITIK,
«Egemen Qazaqstan»
Sýretti túsirgen Erlan Omar,
"Egemen Qazaqstan"
