Tal besikten alǵan tárbıeniń sporttaǵy bapker men sportshy arasyndaǵy qarym-qatynasqa da tikeleı áseri bar. Bir-birine degen syı-qurmeti artyp, bereke-birligi jarasqan ustaz ben shákirttiń baǵyndyrmas bıigi joq. Al endi, ekeýiniń arasyna syzat tússe, tabys shirkinniń qos at alyp qýsań da jetkizbesi belgili...
Osydan biraz ýaqyt buryn bizdiń sportta oǵash oqıǵa oryn aldy. Tennısten Qazaqstannyń birinshi raketkasy, WTA reıtıngi boıynsha álemdegi 50-oryndaǵy Iýlııa Pýtınsevanyń bapkeri Roman Kıslıanskııdi dúıim jurttyń kózinshe jerden alyp, jerge salǵanyn ǵalamtordan kórmegen adam kemde-kem. AQSh-tyń Nıý-Heıvın qalasynda ótken týrnırdiń birinshi aınalymynda fransýz qyzy Alıze Korneden 0:3 esebimen jeńilip jatqan Pýtınseva bapkerin shaqyryp alyp, «Taz ashýyn tyrnadan alady» demekshi, jeńilip jatqanyn jattyqtyrýshysynan kórip, aýzyna kelgenin aıtqany shynynda da jaǵa ustatty. Jáne mundaı soraqy qylyqty elimizdiń atynan synǵa túsip júrse de, Reseıden kelgen tikbaqaı tennısshi kórsetti ǵoı dep ózimizdi jubatýdyń esh qajeti joq. Aınalyp kelgende, bul báribir de bizdiń sporttyń bedeline nuqsan keltirgen ersi qylyq, abyroısyz is boldy.
Árıne, keıin dolylyǵyn dodada kórsetýge tıis tennısshi qyz jarııa túrde jattyqtyrýshysynan, jankúıerlerinen keshirim suraǵan boldy. Biraq, júrekte dyq qalyp qoıdy.
Osydan pálenbaı jyl buryn sol kezde ataǵy dúrkirep turǵan bir boksshynyń sport zalynda bapkerimen sózge kelip qalǵanynyń kezdeısoq kýási bolǵan edik. Jańaǵy áýmeser ózin bala kúninen baǵyp-qaǵyp, búgingi bıigine jetkizgen ustazyna balaǵat sóz aralastyryp, uryp jibererdeı tónip-tónip kelip, biraz «áńgime» aıtyp tastaǵany bar-tyn. «Estigen qulaqta jazyq joq», jerge kirip kete jazdap biz turdyq...
Qazir ǵoı, sol boksshy ózi de shákirt baptap júrgen jattyqtyrýshy. Biraq, birneshe jyldyń muǵdary boldy, qansha jerden monshaqtap ter tókse de bir de bir shákirtiniń jetistikke jetkenin kórmedik. Tipti daryndy degen keıbir shákirtteriniń basqa bapkerlerge «qashyp» ketip, munyń jattyǵý kezindegi ospadar qylyqtaryn jurtqa aıtyp júrgenin de qulaq shalǵan. Mine, alǵashqy bapkerin, ustazyn syılamaǵannyń búgingi keıpi osyndaı. «Atańa ne qylsań, aldyńa sol keledi» degenniń kebi osy bolar...
Osyndaı jaıttarǵa qarap otyryp, «Uıada ne kórseń, ushqanda sony ilesiń» degen atam qazaqtyń ataly sózine taǵy bir márte tánti bolasyń. Ras, joǵarydaǵy eki jaǵdaıdyń da tamyry túptep kelgende tárbıede jatyr-aý. Bapkerin betten alǵan shákirtten, ata-anasyn syılamaǵan baladan túptiń túbinde ultyn súımeıtin urpaq ósip shyǵatynyna kúmándanýdyń da qajeti joq.
Qazir kóptegen ata-analar mektepke, al mekteptegiler ata-anaǵa senip, eki ortada bala betimen ketedi. Taǵy bir jaǵdaıda, ata-analar balasyn qorǵap shyǵa keledi. Baıaǵyda mektepke jetelep aparǵan áke-sheshemiz muǵalimge «Eti seniki, súıegi meniki» degen jalǵyz aýyz sóz aıtýshy edi. Al qazirgi balalardy túrtip qalmaq túgil, daýysyn kótergen muǵalimdi ata-ana sotqa súıreıdi. Tipti, oqýshynyń muǵalimge tap berip, sabap tastaǵan oqıǵalary ǵalamtorda úırenshikti kóriniske aınalǵan. Sumdyq!
Joǵarydaǵy ustaz ben shákirt arasyndaǵy qarym-qatynasqa qaıta oralaıyqshy. Bapkerin ákesindeı syılaǵan sportshylardyń álemdik deńgeıdegi dodalarda áıdik tabystarǵa qol jetkizgenin talaı kórdik. Sonyń jarqyn mysalynyń biri – London Olımpıadasynyń chempıony Serik Sápıev. Bir ǵana mysal, osy Serik 2007 jyly álemniń eki dúrkin chempıony bolyp Qaraǵandyǵa oralǵan kezde ózine syıǵa tartylǵan páterdi bapkeri Aleksandr Strelnıkovke bergeni este. Bir ǵana bul emes, chempıon talaı jerde aldymen ustazyn tórge shyǵaryp, tóredeı kútetin. Mine, osyndaı izetti iltıpat, berik ustanym Serik Sápıevteı bylǵary qolǵap sheberin qazaq sportynyń iri tulǵasyna aınaldyrdy emes pe?!
Iá, ustazyn syılamaǵan uıatqa qaldyrady. Al ustazyn ulyq kórip, pir tutqannyń upaıy ǵana túgel bolmaıdy, óskeleń urpaq aldyndaǵy úlgi tutarlyq tulǵasy da zoraıa bermek!
Qaırat ÁBILDA,
«Egemen Qazaqstan»
