Polısııa qyzmetkerleri qyraǵylyq tanytyp, Qamysty, Qarabalyq, Naýyrzym aýdandarynda barlyǵy urlanǵan 57 tonna astyqty sharýashylyqtarǵa qaıtardy.
Naýyrzym aýdanyndaǵy bir sharýashylyqta 27 jastaǵy mehanızator men 42 jastaǵy kúzetshi aldyn ala kelisip, 35 tonna bıdaıdy jymqyrǵan. Onyń quny 2 mıllıon teńgeden asady. Polıseıler jumysynyń arqasynda urlanǵan bıdaı sharýashylyq ıesine qaıtaryldy.
Qamysty aýdanynda reıd kezinde polıseıler tirkemesi bar «KamAZ» mashınasyn toqtatty. 34 jasar júrgizýshiniń 18 tonna astyqty urlap bara jatqany belgili boldy. Bıdaıdyń quny 900 myń teńgege baǵalandy. Polıseıler bıdaıdy sharýashylyqtaǵy tórt mehanızatordyń aldyn ala kelisip urlaǵanyn anyqtady. Urlanǵan astyq ıesine qaıtaryldy, endi QR QK 2- bólimi , 188-baby boıynsha tergeý jumystary júrip jatyr. Mundaı urlyq Qarabalyq aýdanynda da oryn aldy. Aýdandaǵy Beloglınov selosynyń 21 jasar turǵyny kombaınnan bıdaıdyń elıtalyq sortyn urlaǵan. Bıdaıdyń bul sortynyń tonnasy 90 myń teńge turady. Ury 4 tonna bıdaıdy jymqyrǵan. Urlyqty polıseıler túsken aryz boıynsha ashty. Qazir aldyn ala tergeý amaldary júrip jatyr.
Názıra JÁREMBET,
«Egemen Qazqstan»
QOSTANAI
