Elimizde kún saıyn 100-ge jýyq qaterli isikke ushyraǵan jandar tirkeledi eken. Máselen, Almaty qalasynda osy naýqastyń kesirinen kóz jumǵandar sany byltyrǵymen salystyrǵanda 13 paıyzǵa ulǵaıypty. Qaraǵandy men О́skemen qalalaryndaǵy kásiporyndardyń zııandy qaldyqtary da osy naýqastyń kóbeıýine sebep bolyp otyr.
Al ken salasynyń kásiporyndarynda 1,5 mlrd tonna ónerkásiptik qaldyqtar úıýli tur. Olardy tógetin 476 polıgonnyń 86 synda sanıtarlyq standarttar men ekologııalyq normalar buzylǵan. Barlyq ónerkásiptik zııandy qaldyqtardyń 80 paıyzǵa jýyǵy Shyǵys Qazaqstanǵa tıesili eken. Osy oblys ákimdiginiń qoldaýymen 2011 jyly qoǵamdyq negizde qorshaǵan ortany qorǵaý jónindegi ortalyq qurylyp, ol halyqaralyq ekologııalyq menedjmenttiń negizinde jumys isteıdi. Onyń tájirıbesin Mańǵystaý men Aqtóbe oblystary da úırenýde. Alaıda qorshaǵan ortanyń ekologııalyq zııandylyǵyn baǵamdaıtyn olardyń normatıvteri KSRO kezinen qalǵan kúıinde, ıaǵnı búgingi kúnniń talabyna saı emes. Sondyqtan qorshaǵan ortaǵa qazirgi talapqa saı, ǵylymı negizdelgen saraptama jasalýy kerek.
Sonymen birge, jergilikti atqarýshy organdardyń ekologııalyq máseledegi jaýapkershiligin arttyrý ózekti máseleniń biri. О́kinishke qaraı, olar jergilikti bıýdjetti josparlaǵanda ekologııalyq máseleni basymdy problemalar qatarynan shyǵaryp tastaýda. Sondyqtan osy baǵyttaǵy máselelerdi túbegeıli zerttep, ekologııany jaqsartý sharalary týraly jazbasha jaýap berýińizdi ótinemin, dep men Premer-Mınıstr Baqytjan Saǵyntaevtyń atyna depýtattyq saýal joldadym. Ekologııalyq másele ústirtin qaraıtyn dúnıe emes, ol júzdegen adamdarymyzdyń ómirden mezgilsiz ketýine sebep bolyp, qanshama otbasylaryna qaıǵy ákelýde. Osyny túsingen birneshe áriptesterim de meni qoldap, Úkimet basshysyna joldanǵan saýalǵa qol qoıdy.
Artýr PLATONOV,
Ekologııa máseleleri jáne
tabıǵat paıdalaný komıtetiniń múshesi
