Taıaýda Qaraǵandydaǵy Medsanchast aýdanynyń mańynda jer úıdiń ıesi Sergeı Kaýbre aýlasynda qoqıqazdyń balapanyn taýyp aldy. Ol ekzotıkalyq qonaqty úıine alyp, arnaıy mamandarǵa habarlasqan.
– Bizge qala turǵyny habarlasyp, óziniń aýlasynda qoqıqazdy taýyp alǵanyn málimdedi, – deıdi QR AShM orman sharýashylyǵy jáne janýarlar áleminiń Qaraǵandy oblystyq aýmaqtyq ınspeksııasynyń jetekshisi Abaı Áljanov. – Basynda biz oǵan senbedik. Sergeı qatelesken bolar dep oıladyq, sebebi bizde qoqıqazdy kezdestirý – óte sırek bolatyn jaıt. Ol kisi tyrnany taýyp alǵan bolar dep boljam jasadyq. Alaıda, onda barǵanymyzda ol jas qoqıqaz bolyp shyqty. Bizdiń mamandar qusty keńsemizge alyp keldi.
Mamandardyń aıtýynsha, balapan qamaýda ósken qoqıqazǵa uqsamaıdy, sebebi mundaı qusty onyń tamaqtaný ereksheligine baılanysty asyraý óte qıyn. Qoqıqazdar tek tushy sý qoımalarynda ǵana ómir súredi, jáne de denesinde karotıni bar kishkentaı shaıandarmen tamaqtanady, sonyń arqasynda qustardyń qaýyrsyndary qyzǵylt túske boıalady eken.
– Balapan qanatyn endi jaıyp, usha bastaǵan soń osynda ushyp kelgen bolar, – dep boljamdaıdy Abaı Áljanov. – Ol adamdardan múldem qoryqpaıdy. Al onyń adamdardyń úıine kelýi, ábden sharshap-shaldyqqanyn, kómekke muqtaj bolǵanyn kórsetedi. Sonymen qatar, balapannyń jaýrap qalǵany baıqalady. Biz onyń boıyn jylytý úshin bólmege jylytqysh qoıdyq. Sodan soń ol ájeptáýir shırap qalypty.
Qazirgi tańda qoqıqaz Aqmola oblysynda ornalasqan Qorǵaljyn memlekettik tabıǵı qoryǵyna jetkizilgen. Osy sulý qustar dál sol jerde, Teńiz kóliniń aralynda ómir súredi.
Tabıǵatty qorǵaýshylar qaraǵandylyqtarǵa sanalylyqtary men tabıǵatqa beıjaı qaramaıtyndyǵy úshin alǵys bildirdi.
Mıras ASAN,
«Egemen Qazaqstan»
Qaraǵandy oblysy
