Foto: Berikhan Taıjigit; Vıdeo: aýyl turǵyndary
Muny kórgen eldi mekenniń turǵyndary ań-tań. Ań-tań bolmaǵanda qaıtsin, uzyndyǵy 10, eni 5 metrge jýyq jerdi áldekim tik kóterip, oıyp alyp, 1 metrdeı jerge jyljytyp qoısa.
«Bul – adam balasynyń qolynan kele qoıatyn is emes. Aýyl syrtyndaǵy jazyq alańqaıǵa kelip, iz salǵandardyń bógdeǵalamsharlyqtar ekendigine daý joq», deıdi aýyl turǵyndary.
Adam aıtsa nanǵysyz bul oqıǵa Bozaı aýylynan 12 shaqyrym jerde bolǵan kórinedi. Aýyldyń jigitteri oıyp alynǵan jerdi beınekameraǵa túsirip, uzyndyǵyn, enin, qalyńdyǵyn muqııat ólshep shyǵypty. Romb tárizdi etip oıylǵan jerdiń uzyndyǵy – 12, eni – 5 metr, qalyńdyǵy 40 santımetr shamasynda eken. Oıylyp alynyp, jyljytylǵan jerdiń joǵarǵy bóligi kádimgideı topyraqtyń ústine shyǵyp jatyr. Astynda qol sııatyndaı qýys ta bar. Oıylǵan jerdiń janynan uzyndyǵy 20 metrge jýyq syzyq sekildi jaryqty kórýge bolady.
«Meni tańǵaldyryp turǵany, osydan úsh-tórt kún buryn kelip beınekameraǵa túsirgenimizde «rombynyń» aýmaǵy kólemdileý edi. Endi qarasam, on santımetrdeı jaryq syzyq kádimgideı kómilip barady», dedi osy aýyldaǵy mekteptiń tarıh pániniń muǵalimi Ádilbek Baımollaev telefon arqyly tildeskenimizde.
Tylsym oqıǵa bolǵan aýmaq Bozaı aýylynyń turǵyny Erlan Abaevqa tıesili shabyndyq jer eken. Jigit aǵasy qazylǵan jerge áýelde jóndi mán bermegenin aıtady.
«О́tkende qalyń shóptiń ortasynan áldekimderdiń jerdi qazyp ketkenin kórip qynjylǵanym ras. Keıin jigitter aıtqanda, kelip, kórip, óz kózime ózim senbedim. Jalpy, bul jer Saryoba dep atalady, tarıhy da tereńde jatyr», deıdi ol. Tarıh degennen shyǵady, kezinde dál osy aýylda Gúlǵaısha atty ataqty emshi bolǵan desedi. Emshige elimizdi qoıyp, Keńes Odaǵynyń túkpir-túkpirinen janyna shıpa izdegen adamdar aǵylyp kelip jatady eken. «Bozaı mańyna bógdeǵalamsharlyqtardyń sol tusta kelgeni jaıynda derekter de bar», – deıdi aýyl turǵyndary. Endeshe, muny bógdeǵalamsharlyqtardyń Bozaıǵa jasaǵan ekinshi «sapary» deımiz be? Álde...
