Memleket ardagerler aldyndaǵy boryshyn tereń sezinedi. Kúndelikti qamqorlyq pen qoldaýdy qajet etetin asyl paryz búginde Úkimet ustanǵan áleýmettik saıasattyń bir bóligine aınalyp otyr.
Áleýmettik qorǵaý salasyndaǵy memlekettik saıasattyń negizgi ustyny zeınetaqymen qamsyzdandyrý bolyp sanalady. Zańnamada jyl saıyn zeınetaqy tólemderin ınflıasııa deńgeıinen 2%-ǵa artyq mólsherde ındeksasııalaý kózdelgen. Sonymen qatar, 2017 jylǵy 1 shildeden bastap, Qazaqstan Respýblıkasynyń Prezıdenti N.Nazarbaevtyń tapsyrmasyn oryndaý maqsatynda 2016 jylmen salystyrǵanda 20%-ǵa deıin ósimin qamtamasyz etý úshin jasyna baılanysty jáne eńbek sińirgen jyldary úshin zeınetaqy tólemderiniń mólsheri, memlekettik bazalyq zeınetaqy tólemi ulǵaıtyldy.
Zeınetkerlerdiń kedeılikke ushyraýynyń aldyn alý jáne azamattardyń ekonomıkalyq belsendiligin yntalandyrý aıasynda 2018 jyldyń 1 shildesinen bastap bazalyq zeınetaqynyń taǵaıyndaý tártibi ózgeredi jáne ol eńbek ótili men zeınetaqy júıesinde qatysý ótiline sáıkes taǵaıyndalatyn bolady. Bul degenińiz, kóp jumys istegen jáne zeınetaqy júıesine aýdarymdar júrgizgen azamattardyń zeınetaqysy kóp bolady. Sondaı-aq, 2018 jyldyń 1 qańtarynan bastap kúnkóris deńgeıiniń quramyn qaıta qaraý nátıjesinde, onyń ólshemi 2017 jylmen salystyrǵanda 16%-ǵa deıin artyp, bul tıisinshe bazalyq zeınetaqynyń, múgedekter úshin, asyraýshysynan aıyrylǵan otbasylarǵa áleýmettik járdemaqylardyń, múgedek balalardy tárbıeleýshilerge beriletin járdemaqylardyń jáne ataýly áleýmettik kómektiń mólsherin arttyrýǵa septigin tıgizedi. Jalpy, aǵymdaǵy jyly, jergilikti bıýdjettiń múmkindikterin eskere otyryp jáne bıznestiń áleýmettik jaýapkershilik aıasynda 5 mlrd teńgeden astam, onyń ishinde birjolǵy materıaldyq kómek retinde - 2,3 mlrd teńge (160,2 myń adam); qoǵamdyq kólikte jeńildetilgen tártipte jol júrýge - 854,1 mln teńge (120 myń adam); arzan baǵada dári-dármekpen qamsyzdandyrýǵa - 124,8 mln teńge (19,2 myń adam); tis jóndeýge - 107 mln. teńge (1,6 myń adam); shıpajaı nysandarynda emdelýden ótýge - 1 mlrd teńge (15,1 myń adam); turǵyn úıdi jóndeýge - 14,6 mln teńge (171 adam); otynmen qamtýǵa - 119,6 mln teńge (5,2 myń adam); kómektiń basqa da túrlerine - 394,8 mln teńge (42,2 myń adam) qarajat jumsaý josparlanǵan.
Qazirgi tańda jergilikti bıýdjet esebinen qart azamattar men múgedekter arnaýly áleýmettik qyzmettermen qamtamasyz etiledi. Búgingi tańda 110 stasıonarly ınternat úı, 53 kúndizgi stasıonar jumys jasaıdy, olardyń qyzmetimen 3,5 myńnan astam egde jastaǵy adam qamtylǵan. Áleýmettik kómek kórsetý bólimsheleri úıde shamamen 44 myń qarııa men múgedekke qyzmet kórsetýde. Budan tys, qart adamdardy, sonyń ishinde jalǵyzbasty jáne tasymaldaýǵa kelmeıtin adamdardy kúndizgi stasıonar men úı stasıonary jaǵdaıynda emdeýge jaǵdaı jasalýda. Búginde Qazaqstanda 2,1 mıllıonnan astam jasy kelgen zeınetker ómir súredi.
Eske sala ketsek, 1990 jyly 14 jeltoqsanda BUU Bas Assambleıasy 1 qazandy Halyqaralyq qarttar kúni dep belgilegen.
