«30 qyrkúıek - 1 qazan kúnderi Býharestte (Rýmynııa) Halyqaralyq aýyr atletıka federasııasy (IWF) Atqarýshy komıtetiniń kezekti otyrysy ótti. Otyrys barysynda IWF-tiń máseleleri, atap aıtqanda, salmaq kategorııalarynyń sany men Olımpıada oıyndarynyń kvalıfıkasııalyq erejelerin ózgertý jáne taǵy sol sııaqty máseleler talqylandy. Ásirese, otyrys kezinde talqyǵa túsken antıdopıngilik sharalar BAQ pen Halyqaralyq olımpıadalyq komıtettiń erekshe nazaryn aýdardy. Sebebi, bul suraqtar aýyr atletıkanyń bolashaǵyna tikeleı baılanysty. Beıjiń (2008) men Londondaǵy (2012) Olımpıada oıyndaryna qatysýshylardyń synamalaryna «re-saraptama» kezinde dopıngtiń san márte anyqtalýyna baılanysty IWF qazir erekshe nazarda», - delingen QR AAF-tyń taratqan málimdemesinde.
Eske salsaq, 2016 jyldyń maýsymynda Tbılısı qalasynda IWF Atqarýshy komıtetiniń otyrysy ótken bolatyn. Onda Beıjiń jáne Londondaǵy Olımpıada oıyndary kezinde sportshylary antıdopıngtik zańnamany úsh jáne odan kóp ret buzǵan memleketterdi jarystan 1 jylǵa shettetý týraly sheshim qabyldandy. Atalǵan tizimge aýyr atletıka sportynda kóshbasshy sanalyp kelgen 9 memleket endi. Onyń ishinde Qazaqstan da bar.
«Kútilgendeı, Atqarýshy komıtettiń músheleri «Tbılısı sheshimin» qaıta qýattap, arnaıy komıssııanyń keńesi negizinde onyń oryndalý joldaryn talqylady. Qazaqstandyq federasııa atalǵan máseleler talqylanǵan barlyq satyda birneshe sebepter boıynsha ózine sanksııalardyń engizilýin ádiletsiz ekendigin aıtqan bolatyn. Federasııanyń basqarýshy quramy tolyqtaı aýystyrylyp, antıdopıngilik saıasat jetildirilip, qatańdatyldy. Osynyń nátıjesinde, 2016 jáne 2017 jyldary qazaqstandyq atletterden tyıym salynǵan preparattar tabylǵan joq. Atalǵan aqparat qazaqstandyq delegasııa arqyly IWF Atqarýshy komıtetine joldandy», - dep habarlady Federasııadan.
Sondaı-aq, habarlamaǵa sáıkes, qazaqstandyq federasııa Atqarýshy komıtette osy jyldyń maýsym aıynan bastap IWF vıse-prezıdenti bolyp saılanǵan QR AAF prezıdenti Janat Túsipbekovpen tanystyrylǵan bolatyn.
«IWF-tiń resmı málimdemesine sáıkes, sheshimdi oryndaý jáne qajetti sharttar týraly aqparat osy jyldyń qazan aıynyń ortasynda 9 ulttyq federasııaǵa joldanatyn bolady. Qazaqstandyq tarap atalmysh tártiptik sharalardyń eshbiri Qazaqstannyń jasóspirimder jáne jastar quramasyna qoldanylmaýy, sonymen birge qazaqstandyq ókilder men federasııa tolyǵymen halyqaralyq jáne azııalyq federasııanyń basqarýshy organdarynda jumystaryn jalǵastyra berýi úshin kúsh salýda.
Kútilip otyrǵandaı, negizgi tártiptik shara - QR eresekter quramasynyń 12 aıǵa shettetilýi bolmaq. Arnaıy komıssııanyń 9 eldiń dopıngke qarsy kúres salasyndaǵy ahýalyna júrgizetin monıtorıngisiniń qorytyndysy negizinde shettetý merzimi budan da erte aıaqtalýy múmkin», - delingen habarlamada.
