Aqmola oblysy ishki saıasat basqarmasynyń О́ńirlik kommýnıkasııalar qyzmeti «Nur Otan» partııasynyń oblystyq fılıalynyń baspasóz qyzmetine silteme jasaı otyryp taratqan aqparatynda Prezıdenttiń baǵdarlamalyq maqalasy jańa ıdeologııalyq qujat ekendigi erekshe atalǵan. Bul rette «Nur Otan» partııasynyń Aqmola oblystyq fılıaly tóraǵasynyń birinshi orynbasary Ǵalym Bekmaǵambetov bylaı deıdi: «Bolashaqqa baǵdar: rýhanı jańǵyrý» baǵdarlamalyq maqalasynda Memleket basshysy latyn álipbıine aýysýdyń josparyn usyndy, respýblıkany latyn álipbıine kóshirý – bul ýaqyt talaby». Shynynda da qazir tehnologııa men ınnovasııa tek latyn tilinde taraıtyndyqtan Elbasy da óz maqalasynda muny naqty jazǵan: «Latynshaǵa kóshýdiń tereń logıkasy bar. Bul qazirgi zamanǵy tehnologııalyq ortanyń, kommýnıkasııanyń, sondaı-aq HHI ǵasyrdaǵy ǵylymı jáne bilim berý prosesiniń erekshelikterine baılanysty. Mektep qabyrǵasynda balalarymyz aǵylshyn tilin oqyp, latyn áripterin onsyz da úırenip jatyr. Sondyqtan, jas býyn úshin eshqandaı qıyndyq, kedergiler bolmaq emes», – deıdi Nursultan Ábishuly.
Aqmola oblysy ardagerler keńesiniń tóraǵasy Ǵosman Tóleǵul da óz sózinde statıstıkaǵa júgine otyryp, álem halyqtarynyń 80 paıyzy latyn álipbıin paıdalanatyndyǵyn alǵa tartty. «Álemdik aqparattyń basym bóligi sonyń kómegi arqyly jasalady, ıaǵnı búkil adamzat qazirgi zamanǵy tehnologııalardy ıgerý, órkenıetti qarym-qatynastardy qalyptastyrý úshin osy jalpy qabyldanǵan grafıkany meńgerýge umtylady», – dedi ol. 2018 jyldan bastap jańa álipbıdi úıretetin mamandardy jáne orta mektepterge arnalǵan oqýlyqtardy daıyndaýǵa kirisý týraly naqty tapsyrmalar bergen bolatyn. О́ıtkeni mundaı aýqymdy mindetterdi júzege asyrý da ońaı sharýa emesi taǵy túsinikti. Bul oraıda fılologııa ǵylymdarynyń kandıdaty Berdibaı Shalabaı quzyretti aqparat jumysynyń qajettiligin kóldeneń tartty. Professordyń paıymynsha, latyn álipbıine ótýge naqty ázirlik qajet. «Álemde latyn grafıkasy basty oryndarda boldy jáne solaı qalyp otyr. Búgingi kúnniń shyndyqtary Qazaqstandy tarıhı turǵydan jaqyn túrkitildes eldermen senimdi mádenı-saıası qatynastar ornatýdy talap etedi», – deıdi B.Shalabaı. Talqylaý barysynda ózge de qatysýshylar tarapynan birqatar oılar aıtylyp, pikirler ortaǵa salyndy.
Osylaısha «Nur Otan» partııasynyń oblystyq fılıalynda bas qosqan Aqmola oblysy demokratııalyq kúshteriniń koalısııasy músheleri Prezıdenttiń baǵdarlamalyq maqalasyna jáne qazaq álipbıinen latynǵa kóshý jobasyna biraýyzdan qoldaý bildirdi.
Asqar TURAPBAIULY,
«Egemen Qazaqstan»
Aqmola oblysy
