– Qurmetti ardagerler, sizder memleketimiz ben Prezıdentimiz Nursultan Ábishuly Nazarbaevtyń saıasaty eń aldymen áleýmettik suraqtardy sheshýge baǵyttalǵanyn jaqsy bilesizder. Qazaqstandy damytýǵa, táýelsiz memlekettiń qalyptasýy úshin ter tókken ardagerlerge qamqor bolý – basty basymdyqtardyń biri bolyp esepteledi. Qazaqstannyń búginde jemisti damýy – aǵa urpaqtyń qalaǵan myqty irgetasynyń nátıjesi. Biz sizderdiń aldaryńyzda boryshtarmyz. Memleket basshysy aıtqandaı sizder – Qazaqstannyń altyn qorysyzdar. Sizderdiń aqyldaryńyz, danalyqtaryńyz ben ómirlik tájirıbelerińiz jas urpaqty tárbıeleýge jumsalýy qajet. Oblys basshylyǵy atynan qoldaýlaryńyz ben úlken qoǵamdyq jumystaryńyz úshin alǵys aıtamyn, sizderge densaýlyq, uzaq ǵumyr tileımin! Otbastaryńyz aman bolsyn! – dedi Berdibek Saparbaev.
Saltanatty sharaǵa júzge tarta aqtóbelik qarııa shaqyryldy. Olar úshin konserttik baǵdarlama ázirlenip, ardagerler men zeınetkerler ózderiniń súıikti ánderin kásibı shyǵarmashylyq ujym men ártisterdiń oryndaýynda tyńdaı aldy.
Merekelik sharada oblystyq ardagerler keńesiniń tóraǵasy Birmanov Keńes Baımuhanuly, eńbek ardagerleri, Aqtóbe oblysynyń qurmetti azamattary – Berkimbaev Smatolla Moldashuly men Sapar Saǵyntaev, sonymen qatar, eńbek ardageri Dýlıa Nıkolaı Emelıanovıch te sóz aldy. Olar oblys basshylyǵyna óńirdiń qart turǵyndaryna kóńil bólip, únemi kómek kórsetip otyratyndary úshin alǵystaryn bildirdi.
Aqtóbe oblysynda jasyna baılanysty 88 myń zeınetker bolsa, olardyń ishinde 90 – Uly Otan soǵysynyń ardageri jáne 7 myńnan astamy – tylda eńbek etkender.
Soǵys ardagerleriniń barlyǵy baspanamen qamtylǵan. Osy jyly UOS Jeńis kúnine oraı 9 myńnan astam soǵys jáne eńbek ardagerlerine 287 mln teńge kóleminde materıaldyq kómek berilgen bolatyn, al qarttar kúnine oraı 20 myńnan astam qarııaǵa 110 mln. teńge kóleminde materıaldyq jáne qaıyrymdylyq kómek kórsetiledi.
Temir QUSAIYN,
«Egemen Qazaqstan»
