Brıfıng barysynda Z.Balıeva Qazaqstanda Bala quqyqtary jónindegi Ýákil ınstıtýty qurylǵannan beri balalar men jastardyń quqyqtaryn qorǵaý salasynda kóptegen ıgi ister atqarylyp, birqatar áleýmettik mańyzdy jobalar iske asyrylǵanyn atap ótti.
«Sonyń biri – Bala quqyqtary jónindegi ýákil janynan ashylǵan Qazaqstan balalary men jastaryna arnalǵan ulttyq senim telefony bolatyn. Búgingi jıynda mundaı senim telefony tek balalar men jastarǵa ǵana emes, qazirgi qoǵam ókilderiniń barlyǵyna qajet ekenin jetkizgimiz keledi. Biz bul pikirimizdi kelip túsken qońyraýlar kórsetkishiniń nátıjesine sáıkes aıtyp otyrmyz», – dedi Z.Balıeva.
Qazaqstanda Senim telefony ótken jyldyń qarasha aıynan beri qyzmet atqara bastaǵan bolatyn. Búgingi kúnge deıin jedel jelige 2 mıllıonǵa jýyq qońyraý shalynǵan. Sonyń ishinde bıylǵy 8 aıda 1 mln 376 myń qońyraý qabyldanǵan bolsa, onyń aıasynda
5 myń bala men jastar ókilderine jedel kómek kórsetilgen. Atap aıtqanda, 1 737 ótinish boıynsha psıhologııalyq jáne zańgerlik kómek kórsetilipti.
Tutastaı alǵanda, senim telefony arqyly ótinish bildirgenderdiń basym bóligi kámelet jasqa tolmaǵan jasóspirimder. Mamandar usynǵan derekterge súıensek, jedel jeli iske qosylǵaly 103 sýısıd jaǵdaıynyń joly kesilip, balalarǵa qatygezdik jasaýdyń 42 oqıǵasyna toqtaý salynǵan. Sonymen birge, eresekter tarapynan seksýaldyq zorlyq-zombylyqqa ushyraǵan 7 balaǵa psıhologııalyq qoldaý kórsetilgen.
Jalpy, táýlik boıy qyzmet kórsetetin «111» telefony arqyly aqparattyq keńes, psıhologııalyq jáne zańgerlik kómek alýmen qatar, bala quqyqtarynyń buzylý faktileri týraly da shuǵyl habarlaýǵa bolady.
Taǵy bir aıta keterlik jaıt, «111» shuǵyl qyzmetiniń jetekshisi ári uıymdastyrýshysy Ysqaq Qulataıdyń málimdeýinshe, bastapqyda balalardy qandaı da bir qaýip-qaterden qorǵaı otyryp, olarǵa telefon arqyly qol ushyn sozyp, kómektesýge baǵyttalǵan bul jelige habarlasýshylardyń basym bóligi eresekter qaýymy bolǵandyqtan, konsýltasııalyq qyzmet aýqymyn meılinshe keńeıtýge týra kelgen. Sol sebepti, jelide jaýap beretin mamandardyń sany kóbeıtilip, sapasyn barynsha jaqsartý máselesi qarastyrylyp jatyr.
Nurlybek DOSYBAI,
«Egemen Qazaqstan»
