Al «Úzdik maman» saıysynyń atalmysh kompanııaǵa qarasty barlyq enshiles kásiporyndardyń basyn biriktirip, keń kólemde ótkizile bastaǵanyna bıyl eki jyl. Byltyr mamandyqtaryna saı Aqtaý jáne Atyraý qalalaryndaǵy óndiris oryndarynda saıys kórigin qyzdyrǵan munaıshylar bıyl Aqtaý jáne Shymkent óńirlerinde, ıaǵnı «QazMunaıGaz» ulttyq kompanııasy» aksıonerlik qoǵamynyń jumysshylary Shymkent qalasyndaǵy «PetroKazahstanOılProdakts» JShS jáne Mańǵystaý oblysyndaǵy «Qarajanbasmunaı» AQ pen Aqtaý qalasyndaǵy «QazTransOıl» AQ oqý-kýrstyq kombınaty aýmaǵynda synǵa tústi. Jumysshylardyń yntasyn arttyrý jáne biliktiligin kóterý, sondaı-aq munaı salasy qyzmetkerleriniń ózara tájirıbe almasýy maqsatyndaǵy saıystyń birinshi kezeńinde munaı-gaz kesheniniń 30 mamandyǵy boıynsha enshiles kásiporyndardyń 3000-ǵa jýyq jumysshysy baq synasyp, qorytyndy bólimde munaı jáne gaz óndirý jónindegi operator, uńǵymalardy zertteý jónindegi operator, qabat qysymyn qoldaý jónindegi operator, munaı kásibi jabdyǵyn jóndeý jáne qyzmet kórsetý jónindegi slesar, tokar, hımııalyq taldaý zerthanashysy, elektr-gazben dánekerleýshi, elektr jabdyqtardy jóndeý jáne qyzmet kórsetý jónindegi elektromonter, uńǵymalardy jerasty jóndeý brıgadasy, uńǵymalardy kúrdeli jóndeý brıgadasy, 320 – sementteý agregatynyń mashınıst-motorısi, avtomobıl jóndeý slesari, avtomobıl júrgizýshisi, tehnologııalyq qondyrǵylar operatory, kompressor qondyrǵylarynyń mashınısi, tehnologııalyq sorǵylar mashınısi, munaı óńdeý mekemeleriniń hımııalyq taldaý zerthanashysy mamandyqtary boıynsha 126 qatysýshy sheberlik synasty.
Jarys barysynda teorııalyq jáne praktıkalyq tapsyrmalardy oryndaý úshin óndiristik nysandarda arnaıy jabdyqtalǵan jumys alańdary, qajetti bólmeler men qural-saımandar daıyndalyp, jarysqa qatysýshylarǵa óz múmkindikterin tolyq kórsetýge jaǵdaı jasaldy. Bıylǵy saıystyń basty ereksheligi – «QazMunaıGaz» ulttyq kompanııasy» aksıonerlik qoǵamy arnaıy veb-saıtynan saıystyń ótý barysy týraly jańalyqtar júıeli túrde berilip otyrdy jáne baıqaý alańdarynda fotograftar men tilshiler saıys barysyna tikeleı kýáger bola aldy, sondaı-aq aımaqtaǵy korporatıvtik portaldyń qoldanýshylary baıqaýdy onlaın rejimde kórý múmkindigine ıe boldy.
Qyrkúıek aıynyń 25-29-y aralyǵynda ótken saıysta jumysshylardyń sheberligin kompanııaǵa qarasty kásiporyndardyń sarapshylarynan quralǵan qazylar anyqtap, jeńimpazdardy tanýda kásibı mashyǵy, tapsyrmalardy oryndaý jyldamdyǵy men qaýipsizdik tehnıkasyn saqtaý sheberligin basty nazarǵa aldy.
Aqtaý qalasynda saltanatty jaǵdaıda qorytyndylanǵan jıynda baıqaýǵa qatysýshylarǵa «QazMunaıGaz» UK» AQ basqarma tóraǵasy S.Myńbaevtyń quttyqtaý haty oqyldy.
Álemdik daǵdarysqa baılanysty munaı baǵasynyń turaqsyzdyǵyna qaramastan, jumyskerlerge áleýmettik qoldaýdyń qazirgi deńgeıi saqtalǵandyǵyn aıtqan hatta «Bul «QazMunaıGaz» ulttyq kompanııasy» aksıonerlik qoǵamy kompanııalar tobynyń bıznes-baǵyttardyń kópshiligi boıynsha oń nátıjelerge qol jetkizýiniń arqasynda múmkin bolyp otyr. Atalǵan zańdy nátıje – ákimshiliktiń, jumyskerler men kásipodaqtardyń jumyla jumys istegeniniń aıqyn kórsetkishi», delingen.
90 myńǵa jýyq maman qyzmet etetin alyp mekemeden sýyrylyp 146 azamattyń shyǵýy ońaı emes. Konkýrs jeńimpazdary «Úzdik maman» medalimen jáne arnaıy sertıfıkattarmen marapattaldy.
– Men Qaraǵandy memlekettik tehnıkalyq ýnıversıtetin munaı salasy mamandyǵy boıynsha bitirip shyqtym. Seriktestikte jumys jasaǵanyma úsh jyl boldy. Osy úsh jyldyń ishinde tájirıbe jaǵynan jetilip, aldyńǵy býyn aǵa-apalardan úırenip kelemiz. Basshylyq tarapynan jumysshylardyń, ásirese jas mamandardyń aıaqtan turyp ketýine, óz isin jetik meńgerýine jasalyp jatqan múmkindikter óte mol. Búgingi saıysty da jumysshylardy alǵa umtyldyratyn, qanattandyratyn sharalardyń biri dep sanaımyn. Bıyl saıysqa alǵash ret qatystym, qıyn saıysta júldeger atanǵanyma qýanyshtymyn. Saıys meni tek jeńimpaz bolýymmen qýandyrmaıdy, aldaǵy ýaqytta jumysty jan-jaqty júrgizýge tájirıbe alýyma septigi tıgendigimen de qýantady. Mysaly, jumysymyz bir bolǵanmen, ár kompanııada jabdyqtar ártúrli, demek, jumys jasaý tásili, tájirıbesi de bólek. Men saıys barysynda ózge kompanııadaǵy áriptesterimnen osy basqa jabdyqtarda jumys jasaýdy úırendim. Kóp bilgenniń artyqtyǵy joq, – deıdi saıys jeńimpazy, «Qazgermunaı» JShS munaı jáne gaz óndirý operatory Ǵazız Merekeev.
Jas munaıshynyń aıtýynsha, saıys tek jeńý úshin emes, tájirıbe almasý úshin de mańyzdy. Olaı bolsa, «QazMunaıGaz» UK» AQ uıymdastyrǵan «Úzdik maman» saıysy óz maqsatyna jetip, negizgi nátıjesin berýde degen sóz.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
