Qamkóńil jandardyń qonys toıy

Oblysta múmkindigi shekteýli jandardy turǵyn úımen qamtamasyz etýge aıryqsha kóńil bólinýde. Ásirese, sal aýrýlaryna shaldyǵyp, qol arbaǵa tańylǵan azamattar úshin arnaıy pandýstarmen jabdyqtalǵan turǵyn úı salý jobasy elimizde tuńǵysh ret bizdiń oblysta ǵana júzege asyrylyp otyr desek, shyndyqtan alshaq ketpespiz. Sonyń aıqyn bir mysaly, jaqynda paı­dalanýǵa berilgen «Bolashaq» shaǵyn aýdanyn­daǵy 40 páterli toǵyz qabatty turǵyn úı bolyp tabylady. Bul sońǵy úsh jylda múgedek jan­darǵa arnaıy salynǵan ekinshi turǵyn úı. Múm­kindigi shekteýli jandardyń qýanyshyn bólisýge oblys ákimi Arhımed Muham­betovtiń ózi keldi. О́ńir basshysy qol arbaǵa tańylǵan qamkóńil azamattardy qýanyshtarymen quttyqtap, jyly lebiz, ystyq yqylasyn bildirdi. – El Táýelsizdiginiń 20 jyldyǵyna taralǵyly tartýlarmen kelip otyrmyz. Elbasy Nursultan Nazarbaevtyń táýelsizdiktiń 20 jyldyǵy qarsa­ńynda halyqtyń ózderin áleýmettik jaǵynan qorǵalǵanyn, barlyq jumystardyń olardyń turmysyn jaqsartýǵa baǵyttalǵanyn sezinetindeı sharýalar isteý jóninde tapsyrmasy oryndalýda. Elbasynyń tikeleı bastamasymen birqatar áleý­mettik baǵdarlamalar júzege asyrylýda, múmkin­digi shekteýli jandar quqyqtyq jaǵynan qorǵaldy. Qazir oblysta múmkindigi shekteýli jandarǵa dári-dármek tegin beriledi, qolarbamen, ortopedııalyq jabdyqtarmen qamtamasyz etý jaqsardy, olar qoǵamdyq kólikte tegin júredi, kommýnaldyq tólemder úshin ótemaqy tólenedi. Sonyń aıqyn dáleli – sal aýrýlaryna arnaıy salynǵan osy turǵyn úı bolyp tabylady. Bul baǵyttaǵy jumys jalǵasyn tabady. Biz múgedek jandardyń qoǵamda ózderin deni saý azamattarmen teń sezinýleri úshin barlyq jaǵdaıdy jasaımyz,– dedi ákim. Múmkindigi shekteýli adamdarǵa arnalǵan osy úıde olarǵa qolaıly jaǵdaı týǵyzylǵan. Ishke qolarbasymen kirý úshin pandýs jasaldy. Bir tonna júk kóteretin lıft jumys isteıdi. Birinshi qabatta qolarba qoıatyn bólme bar. Sondaı-aq, osy qabatta ortopedııalyq, aıaq kıim jóndeý sheber­hanalary , tigin sehy jáne basqa múgedek jandarǵa qajetti jumys oryndary ashylatyn bolady. Olarda keminde jıyrmadan astam múmkin­digi shekteýli azamat jumys isteıdi. Sóıtip, jergilikti bılik «Bir oqpen eki qoıandy» birden atyp aldy deýge bolady. Múgedek jandardy jaıly turǵyn úımen qamtamasyz ete otyryp, olarǵa jumys istep, kúnkóris jasaýǵa jaǵdaı týǵyzyldy. Múmkindigi shekteýli jandar oblys ákimi Arhımed Muhambetovtiń qolynan sý jańa páter kiltterin alyp, qýanyshqa keneldi. 40 páterli osy turǵyn úıdi «Kontakt» JShS saldy. Oǵan bıýdjetten 332,9 mıllıon teńge bólindi. Páterler keń, balkondarynyń ózi qolarba­men qozǵalýǵa qolaıly etip jobalanǵan. Saltanatty sátte sóz alǵan «Aqtóbe qalasyn­daǵy sal aýrýlaryna shaldyqqan azamattardyń quqyǵyn qorǵaý qoǵamy» qoǵamdyq birlestiginiń tóraıymy Quralaı Báımenova, páterli bolǵan Álibek Eleý­sizovtiń anasy Zámza Shalabaeva osyndaı shynaıy qamqorlyqtary, kómekteri úshin Elbasyna, óńir basshysyna shyn júrekten alǵys­taryn jetkizdi. Oblys ákimi Arhımed Muhambetov eki bólmeli páterge qol jetkizgen birinshi toptaǵy múgedek Sábıt Muhıtovtyń otbasynda bolyp, páterdiń jaılyly­ǵyna kóz jetkizdi, qýanyshtaryn bólisti. Eki balasymen anasynyń qolynda turatyn azamat­tyń qýanyshynda shek joq. Budan segiz jyl buryn jol apatynan sal bolyp qalǵan jarymjan balasy men eki nemeresin qaıtsem jetkizemin dep shybyn janyn shúberekke túıip júrgen Sábesh ananyń esine artta qalǵan qıyndyqtar tústi me, kózin jaýlyǵynyń ushymen súrtkilep qoıady. Segiz jyl boıy jaıly páterdiń azabyn tartý ońaı emes, árıne. Semeıde áskerı qyzmetin ótep, ıadrolyq sy­naqtyń zardabynan eki aıaǵynan birdeı aıyrylǵan Qýat Buldyqov ta on jyl úı kezeginde turyp, eki bólmeli páterge qol jetkizipti. Buǵan deıin jataq­hanada turyp kelgen oǵan alǵan páteri han saraıy­nan kem emes. Ol da tolqýly. Degenmen, bul qýa­nyshtyń kóz jasy ekenin túsindik biz. Satybaldy SÁÝIRBAI. Aqtóbe oblysy.