Elimizde et baǵasyn turaqtandyrýdy oılasaıyq

Qazirgi tańda elimizde aýyl sharýa­shy­­lyǵyn damytýǵa kóp kóńil bólinip jatqandyǵy bárimizge belgili. Halqy­myz­dyń ata kásibi – mal sharýa­shy­ly­ǵy­nyń el ekonomıkasyndaǵy alar orny erek­she. Aýyl ekonomıkasynyń, ıaǵnı aýyldaǵy halyqtyń turmys jaǵ­daıy­nyń deńgeıi negizinen osy salanyń da­mýymen tikeleı baılanysty ekeni barshamyzǵa málim. Sondyqtan da mal sharýashylyǵyndaǵy ahýaldy jaqsartý, onyń joǵary deńgeıde damýyna qajetti jaǵdaılardy týǵyzý búgingi tańdaǵy úl­ken maqsattardyń biri bolyp tabylady. Ony sheshý jolynda kóptegen aýqymdy shara belgilengen. Iri qara etin óndirýge arnalǵan mal bordaqylaý alańdary, jemshóp óndirý sehtary, mal soıý, et óńdeý kásiporyndaryn salý jumystary qolǵa alynýda. Jáne de bul másele 2020 jylǵa deıingi damý strategııalyq baǵ­dar­lamasynyń eń mańyzdy mindet­teri­niń biri bolyp otyr. Aýyl sharýashylyǵy mınıstrligi atal­ǵan baǵdarlamanyń negizinde res­pýblıkamyzdyń óńirlerindegi barlyq mal sharýashylyǵymen aınalysatyn ká­sip­kerlermen tyǵyz jumys isteýde. Qa­zirgi tańda osy atalǵan máseleni damytý maqsatynda memleket tarapynan qyrýar qarjy bólinýde. Sonymen birge, qazirgi tańda elimizde et baǵasy sharyqtap barady, munyń bir sebebi shet elderden ákelingen et baǵa­synyń joǵary bolýymen baılanys­ty­rylady. Alaıda, elimizge ımporttala­tyn etke baılanysty jylda memleket ta­rapynan kvota bólinedi. Bul kvotany bólýmen elimizdiń Ekonomıkalyq damý jáne saýda mınıstrligi aınalysady. Atalǵan mınıstrliktiń bólgen kvo­tasy kóbine treıderlik kompanııalardyń jeteginde ketip, elimizdiń basty et óńdeýshi kásiporyndary kvotasyz qalyp jatady nemese osy aradaǵy treıderlik kompanııalardan bólingen kvotany ústeme baǵamen satyp alýǵa májbúr bo­lady. Nátıjesinde, elimizdiń et óńdeýshi kásiporyndaryna ishki rynoktaǵy et baǵasyn kóterýge týra keledi. Budan zardap shegetin taǵy da qarapaıym halyq. Osy jerde týyndaıtyn bir suraq, elimizdegi et óńdeýshi kásiporyndar tikeleı Aýyl sharýashylyǵy mınıstrligimen qarym-qatynasta, biraq, osyǵan  qaramastan, etke kvotany basqa mınıstrlik bólýde. Menińshe, osy atalǵan kvo­tany Aýyl sharýashylyǵy mınıstr­liginiń quzyryna berý óte tıimdi bolar edi. Aradaǵy kóptegen treıderlik kompanııalardan arylar edik, nátıjesinde,  elimizdegi et baǵasy birshama turaqtanar edi. Erzat ÁLZAQOV, Májilis depýtaty.