Qarjy jáne bıýdjet komıtetiniń tóraǵasy Olga Perepechına sharany asha kelip, bul zań jobalary Prezıdent N.Á. Nazarbaevtyń «Qazaqstan jańa jahandyq naqty ahýalda: ósý, reformalar, damý» Joldaýy jáne bes ınstıtýttyq reformany júzege asyrý jónindegi «100 naqty qadam» Ult josparyn iske asyrý maqsatynda ázirlengenin atap ótti. Jobalardaǵy jańalyqtar salyq saıasatyn jetildirýge, salyq ákimshilendirýlerin jaqsartýǵa, salyq salý salasyndaǵy memlekettik qyzmet kórsetýlerdiń tıimdiligin arttyrýǵa baǵyttalǵan.
Zań jobasyn senatorlarǵa ulttyq ekonomıka mınıstriniń birinshi orynbasary Rýslan Dálenov tanystyrdy. Onyń aıtýynsha, jańa Salyq kodeksiniń ıdeologııasy adal salyq tóleýshini qorǵaýǵa baǵyttalǵan. Ol salyq tóleý barysynda daý týyndaǵan jaǵdaıda túsinbeýshilikter men dálsizdikterdi salyq tóleýshiniń paıdasyna túsindiretin bolady.
Ekonomıkanyń túrli sektorlaryn yntalandyrý men ákimshilendirýdi ońaılatý da kózdelip otyr. Birqatar túzetýler bıznestiń salyq zańnamasyna engiziletin ózgeristerden habardar bolýyn arttyrýǵa baǵyttalǵan.
Shaǵyn jáne orta bıznesti damytý úshin qoldanystaǵy arnaıy salyq tártipteri saqtalatyn bolady. Memlekettik jáne salalyq baǵdarlamalar aıasynda qarjylaı emes qoldaý túrinde alynatyn salyq salýdan bosatý da qarastyrylady.
Elektrondyq saýdany damytý úshin elektrondyq saýda salasynda alynatyn korporatıvtik jáne jeke tabys salyǵynan bosatý da kózdeledi. Yntalandyrý sharalary agrarlyq, jer qoınaýyn paıdalaný, qarjy jáne basqa salalarǵa da qatysty bolady.
Qosymsha baıandama jasaǵan qarjy mınıstriniń orynbasary Qanat Baedilov memlekettik kiris organdary salyq tóleýshilermen ózara aıqyn is-qımyl ornatý maqsatynda zańdylyq, tıimdilik jáne ákimshilendirý táýekelderine baǵdarlanǵan ustanymdarǵa súıenetinin atap ótti.
Salyq tártibin arttyrý maqsatynda táýekelderdi basqarý júıesi qaıta qaralady. Salyq tóleýshilerdiń ártúrdi sanattaryna salyq ákimshilendirýiniń túrli tásilderi engiziledi.
«Jasyl top» atalatyn birinshi sanatqa táýekel dárejesi tómen salyq tóleýshiler jatatyn bolady. Olarǵa tekserýler júrgizilmeıdi, esep tapsyrý, bereshekti tóleý merzimderin ózgertý túrindegi bosańsytý, kólbeý monıtorıng júrgizýge qatysý múmkindigi jáne taǵy basqa qaralatyn bolady.
Táýekel dárejesi ortasha topqa ákimshilendirýdiń ortasha tetikteri qoldanylady, habarlama jiberiledi, oryndalmaǵan jaǵdaıda salyq baqylaýy sharalary júzege asyrylady.
«Qyzyl aımaqqa» táýekel dárejesi joǵary salyq tóleýshiler jatady. Olarǵa erekshe nazar aýdarylady jáne salyq mindettemelerin tıisti deńgeıde oryndamaǵan jaǵdaıda kiris organdary jedel áreket etetin bolady.
Q. Baedilov ákimshilendirýdi jetildirýdegi barlyq jańalyqtar bıznesti damytýǵa oń yqpalyn aıta kelip, salyq organdarynyń bıznespen salyq salý tásilderinen áriptestik qatynastarǵa kóshýin qamtamasyz etetinin atap ótti.
Talqylaýǵa senatorlar Darhan Káletaev, Serik Jaqsybekov, Sergeı Ershov, Sársenbaı Eńsegenov, Edil Mamytbekov jáne Ǵumar Dúısembaev qatysyp, ulttyq ekonomıka jáne qarjy mınıstrlikteriniń ókilderine birqatar saýaldar qoıdy.
