«Aq halatty abzal jan» jerlester forýmyna buryn Taıpaqta dúnıege kelgen nemese qyzmet etken 32 bilikti maman qatysyp otyr. Olardyń beseýi kórshiles Atyraý oblysynan kelipti. Dárigerlermen birge Oral qalasynan alystaǵy aýylǵa jyljymaly flıýrografııa jáne mamografııa avtokeshenderi de jol tartty.
- Elbasy Nursultan Ábishuly Nazarbaev «Bolashaqqa baǵdar: Rýhanı jańǵyrý» maqalasynda ult densaýlyǵyn nyǵaıtý máselesin qozǵaǵan bolatyn. Halyq densaýlyǵy «Qazaqstan-2030» strategııalyq joldaýynda da aıqyn kóterilgen. Sondyqtan shalǵaı aýyldarda medısınalyq qyzmet sapasy men onyń qoljetimdiligin arttyrý maqsatynda oblysymyzdyń aldyńǵy qatarly bilikti dárigerleri Taıpaq aýylyna attanǵaly otyr. Olar turǵyndardyń hal-jaǵdaıyn tekserip, konsýltasııa beredi. Aýyl halqy maman dárigerlerdi izdep qalaǵa sabylmaı, óz aýylynda júrip densaýlyǵyn túzeýge, múmkindik alady. Mundaı shara bolashaqta basqa aýyldarda da jalǵasyn tabady, - dedi Batys Qazaqstan oblystyq densaýlyq saqtaý basqarma basshysynyń emdeý isi boıynsha orynbasary Gúlnár Ábdirahmanova.
Aqjaıyq aýdanynda halyqqa 1 ortalyq aýdandyq aýrýhana, 1 aýyldyq aýrýhana, 11 dárigerlik ambýlatorııa, 4 feldsherlik akýsherlik pýnkt, 29 medısınalyq pýnkt medısınalyq qyzmet kórsetedi. Aqjaıyq aýdandyq ortalyq aýrýhanasy 1974 jyly salynyp, 2016 jyly aýdandyq aýrýhana «Jumyspen qamytý 2020» baǵdarlamasy aıasynda kúrdeli jóndeýden ótken. Aýrýhanada 120 kereýettik 2 stasıonar: hırýrgııalyq bólim, travmatologııalyq bólim, gınekologııalyq bólim, emdeý bólimi, balalar bólimi, patologııalyq bólim, perzenthana, juqpaly aýrýlar bólimi, kordıologııalyq reablıtasııa, nevrologııalyq reabılıtasııa qyzmet kórsetedi.
Batys Qazaqstan oblystyq densaýlyq saqtaý basqarmasy baspasóz qyzmeti habarlaǵandaı, 2018 jyly stasıonarda meırbıkelik jáne palıatıvtik kómek kórsetetin kereýettik ashý josparlanýda. Aýdandyq aýrýhana joǵary medısınalyq jabdyqtarmen qamtamasyz etilgen. Aýdan boıynsha 62 dárigerdiń 17-i, 294 orta býyn medısına qyzmetkeriniń 155-si sanatqa ıe. Sonymen qatar 13 dáriger, 25 orta býyn qyzmetkeri, 3 psıholog maman biliktiligin arttyrý kýrstaryna qatysyp, bilimin jetildirgen. Bıyl 7 dáriger sýısıd prevensııasy boıynsha biliktiligin arttyrýdan ótken.
Qazybek Quttymuratuly,
"Egemen Qazaqstan"
Oral qalasy
