Úkimetaralyq komıssııa otyrysynda birinshi bolyp sóz alǵan A.Mamın Qazaqstan men Reseı arasynda orta merzimdegi ındýstrııalyq-ınnovasııalyq yntymaqtastyqty damytý qajettiligine ekpin túsirdi. Bul úshin quny 4,5 mıllıard AQSh dollaryna teń birlesken joba ázirlenýi tıis. Osy turǵyda ol eki taraptyń sarapshylaryna ony júzege asyrýdyń ekijaqty múddelerin bildire alatyn baǵdarlama jobasyn ázirleýdi usyndy. Onyń málimdeýinshe, Qazaqstan men Reseı arasyndaǵy strategııalyq áriptestik jónindegi baǵyt ózgerissiz qala berýimen birge, aldaǵy ýaqytta óziniń jańa arnasyn tabýy qajet.
Búgingi kúni otyn-energetıka kesheninde reseılik kompanııalar qazaqstandyq munaı-gaz kondensat oryndaryn ıgerýde eki jaqqa da tıimdi qarym-qatynastar sheńberinde belsendi is-qımyl tanytyp keledi. Sonyń ishinde úshinshi elder baǵytyna qaraı munaı tasymaldaý isinde eki el múddeleri tolyqtaı eskerilgen. Reseı men Qazaqstan arasynda kólik tranzıtin udaıy ulǵaıta túsý de jetekshi oryn alady deı kele Qazaqstan Úkimeti basshysynyń orynbasary Aqtóbedegi kezdesýde bul máseleler jónindegi kelisimder odan ári shegendele túskenin jetkizdi.
О́z kezeginde I.Shývalov Aqtóbe aımaǵyndaǵy jyly qabyldaý úshin óz rızashylyǵyn bildirdi. Onyń pikirinshe, Qazaqstannyń bul oblysy – naqty jetistikter men tabystarǵa qol jetkize bilgen erekshe óńir. Osyndaı ekonomıkalyq áleýeti mol óńirdiń Reseımen shekaralas ornalasýy óte mańyzdy. Mundaǵy Aqtóbe rels-arqalyq zaýyty atqaryp otyrǵan úlken jobalar biz úshin de óte qajet. Biz ony birlesken jobalar qataryna qosa alamyz. О́ıtkeni zaýyt ónimderiniń keıbir bólikteri men bólshekteri Reseıde shyǵarylady, dedi I.Shývalov.
Sondaı-aq úkimetaralyq komıssııa otyrysynda Reseı men Qazaqstan arasyndaǵy taýar almasýda belgili bir shekteýler men «bir qaınaýy ishindegi» jobalar bar ekendigi de tilge tıek etildi. Aldaǵy ýaqytta mundaı shekteýler alynyp tastalýy kerek. Sondyqtan da eki eldiń úkimettik deńgeıdegi sarapshylary buǵan barlyq kúsh-jigeri men resýrstyq múmkindikterin jumsaýy qajettigi de otyrys qorytyndysyna arnalǵan hattamadan kórinis tapty.
Basqosýda Aqtóbe oblysynyń ákimi Berdibek Saparbaev sóz alyp, úkimetaralyq komıssııa otyrystarynyń yqpaly men áseri, onyń shekaralas óńirlerge naqty tıgizetin kómegine qatysty oı-tujyrymdaryn alǵa tartty. Oblys basshysy sonyń bir mysaly retinde ótken toǵyz aıda shekaralas óńirlerdiń arasyndaǵy taýar aınalymy 146 paıyzǵa óskenin málimdedi.
Temir QUSAIYN,
«Egemen Qazaqstan»
Aqtóbe oblysy
