Jyl basynan beri eýropishimde shyǵa bastaǵan gazette saraptamalyq materıaldarǵa basymdyq berildi, tól avtorlary men kolýmnısteri qalyptasty. Ár salaǵa arnalǵan jańa aıdarlar men arnaıy better, tyń jobalar paıda boldy.
Álbette, jańa ýaqyt – ınternet keńistigindegi múmkindikter kezeńi dep sıpattalǵanymen sapaly gazet kontenti áli de dástúrli oqyrmannyń suranysyna ıe bolyp qala bermek. О́ıtkeni qazir tehnologııanyń sony jetistikteri árkimniń qolyna bir-bir kamera, qoljetimdi ınternet júıesi arqyly aqparat taratý keńistigin «syılap» otyr. Árıne, talǵamǵa tarazy joq. Dese de smartfon men gadjet ıeleriniń oı-paıymy tutas redaksııanyń, qalyptasqan dástúrli aqparat quralynyń mindetin arqalaýǵa qaýqarsyz. Sondyqtan da sanaly oqyrman senimdi aqparat kózi retinde dástúrli medıanyń ónimderin tutynady. О́ıtkeni dástúrli medıa aqparat taratý qoǵamnyń nazaryn aýdarý ǵana emes, jýrnalıst aldyndaǵy jaýapkershilik ekenin jiti túsinedi. Osy turǵyda ǵasyrǵa jýyq tarıhy bar aǵa gazette ormandaı oqyrmannyń oıynan shyǵý nıetimen keri baılanys tetikteri júıelene tústi. Bul úshin oqyrmandarǵa gazettiń kúndelikti sanynyń edel-jedel jetýiniń mańyzy zor.
«Egemen Qazaqstan» gazeti osy ýaqytqa deıin oqyrman qolyna negizinen jazylym arqyly jetkizildi. Aıtalyq, gazettiń bólshek saýdadaǵy úlesi 1 ǵana paıyzdy quraǵandyqtan, oqyrmandardyń 99 paıyzy gazetti jazylý arqyly alatyn. Al jeke satylym «Qazposhta» bólimsheleri arqyly uıymdastyrylyp keldi. Endi gazettiń taralym saıasaty qaıta qaralyp, kúndelikti gazet nómiri turaqty túrde bólshek saýdaǵa shyǵarylatyn boldy. Iаǵnı redaksııa men taratý kásiporyndary arasynda gazetti bólshek saýdada satý týraly kelisimge qol jetkizildi. Máselen, aldaǵy ýaqytta «Kazakhstan Today» agenttigi» JShS-ine qarasty «Karavan» dúńgirshekter jelisiniń 61 núktesinde «Egemen Qazaqstan» gazeti satylymǵa shyǵaryla bastaıdy. Bul dúńgirshekter Almaty qalasynda ornalasqan. Alyp megapolıstegi gazettiń satylymy halyqqa qyzmet kórsetý ortalyqtarynda da júrgiziletin bolady. Naqty aıtqanda, «Evrıka press» JShS-men bekitken kelisimshartqa sáıkes, gazetti Almaty qalasynyń Bostandyq aýdandyq jáne Áýezov aýdandyq HQO-dan alýǵa bolady. Bul mekenjaılarǵa gazet 2017 jyldyń 26 qarashasynan bastap túse bastaıdy. Al Astana qalasynda gazet Saryarqa aýdandyq jáne Almaty aýdandyq HQO-da satylady. Gazet satylymyn uıymdastyrý baǵytyndaǵy jumystar aldaǵy ýaqytta da jalǵasyn taba bermek. Jalpy, ótken ǵasyrdyń toqsanynshy jyldarynyń ortasynan bastap gazettiń jeke dúńgirshekterde satylýy kilt toqtaǵandyqtan, naryqtyq tetikter júıesimen satylymǵa shyǵarylýy araǵa shırek ǵasyr salyp qaıtadan qolǵa alynyp otyr deýge bolady.
Búginde álemdegi damyǵan elderdiń aqparattaǵy mádenı keńistigine nazar aýdarsańyz, merzimdi basylymdardyń róli nyǵaıa túskenin ańdaýǵa bolady. Máselen, Japonııa ınnovasııalyq tehnologııanyń túrli býynyn dúnıege alyp kelip jatsa da merzimdi baspasózden bas tartpaǵan el. Aıtalyq, japonnyń «Asahı Shımbýn» basylymy 6,2 mıllıon dana taralymmen kúnine 2 márte jaryq kóredi. Japon araldarynda kúnine mıllıondaǵan taralymmen oqyrmanǵa jol tartatyn gazetter týraly kóptep mysal keltirýge bolady. Bul gazet oqýdyń ozyq mádenıeti. Bizdiń mindetimiz de elimizde gazet oqý mádenıetin nyǵaıta túsý bolmaq. Qazir aıtýly sarapshylar gazetti gazet kúıinde oqýdyń elektrondy nusqaǵa qaraǵanda kóz janaryna áseri, jadyǵa jattalýy erekshe bolatynyn aıtyp júr.
Bas basylym oqyrmandarynyń aýqymdy bóligi bıýdjet qyzmetkerleri, onyń ishinde elimizdiń túkpir-túkpirinde eńbek etip jatqan muǵalimder men dárigerler qaýymy ekeni belgili. Osy rette oqyrmandar basylym betinen barlyq salaǵa qatysty aqparatqa qanyǵa alatynyn aıtqymyz keledi. Jyl basynan beri mektep pen balabaqsha qyzmetkerleriniń oqý ádistemesi men bala tárbıesine arnalǵan «Tálim» beti, joǵary bilim berý júıesine baǵyttalǵan «Bilim» beti jaryq kóredi. Atalǵan better alystaǵy aýyldar úshin jańa bilim júıesiniń jańalyqtary men ádistemelerinen habardar bolyp otyrýǵa jasalǵan múmkindik retinde baǵalanyp otyr. Sondaı-aq oqýshylardy jańa formattaǵy Ulttyq biryńǵaı testileýge daıarlaýǵa kólemdi oryn berildi. Osy ispetti oramdy jobalar áli jalǵasyn tabady. Bul rette redaksııa ujymy Qazaqstan men jahandaǵy ózekti oqıǵalarǵa beıjaı qaramaıtyn ozyq oıly oqyrmandarmen tyǵyz áriptestik ornatýǵa múddeli ekenin esterińizge salamyz.
