Foto: 1news.az
«Fars» agenttiginiń málimetinshe, Vashıngton Irannan AQSh-qa qatysty ótemaqy talaptarynan tolyq bas tartýdy suraǵan. Sonymen qatar amerıkalyq tarap shamamen 400 keli baıytylǵan ýrandy AQSh-qa berýdi jáne eldegi ıadrolyq nysandardyń tek bir kesheniniń ǵana jumys isteýin talap etip otyr.
Budan bólek, AQSh Iran aktıvteriniń bir bóligin bolsa da buǵattan shyǵarýǵa qarsy ekenin bildirgen. Vashıngton áskerı áreketterdi toqtatýdy kelissózderdiń ári qaraıǵy barysymen baılanystyrǵan.
Buǵan deıin Iran da kelissózderge qaıta oralý úshin óz sharttaryn jarııalaǵan bolatyn. Tegeran barlyq baǵyttaǵy soǵysty toqtatýdy, sanksııalardy alyp tastaýdy, aktıvterdi buǵattan shyǵarýdy, keltirilgen shyǵyn úshin ótemaqy tóleýdi jáne Ormuz buǵazyndaǵy Iran ústemdigin moıyndaýdy talap etken.
Iran bıligi atalǵan talaptar is júzinde oryndalmaıynsha jańa kelissózderdiń bastalmaıtynyn málimdedi.
Al Donald Tramp Irannyń usynystaryn «qabyldaýǵa kelmeıtin talaptar» dep atady.
Sáýir aıynda qol qoıylǵan ýaqytsha bitimge qaramastan, mamyrda taraptar qaıtadan ózara soqqy jasap, kelissózderdiń qaıta jandaný múmkindigin shıelenistirip jibergen edi.
Al jýyrda Tegeran Ormuz buǵazy arqyly Qytaı kemeleriniń ótýine ruqsat bergen bolatyn.
