Elbasynyń tapsyrmasymen «Nur Otan» partııasy mańyzdy memlekettik baǵdarlamalardyń júzege asyrylý barysyna udaıy baqylaý júrgizip keledi. Partııa Tóraǵasy birinshi orynbasarynyń aımaqqa arnaıy kelýiniń de maqsaty – memlekettik qarjynyń tıimdi jumsalýyna kóz jetkizý. «Nurly jol» baǵdarlamasy boıynsha 2017 jyly Mańǵystaý oblysyna 80 mıllıard teńge kóleminde qarajat bólindi. Búginde bul qarjyǵa turǵyn úı-kommýnaldyq sharýashylyq nysandary jańǵyrtylyp, mektepter men balabaqshalar salynýda jáne óńirdiń kólik ınfraqurylymy da qarqyndy damýda.
Osyndaı memlekettik qoldaýdyń jarqyn kórinisi retinde «Kaspıı» sý tushytý zaýytyn aıtýǵa bolady. Muhtar Qul-Muhammed pen Mańǵystaý oblysynyń ákimi Eraly Toǵjanov zaýyttyń jumys barysymen tanysty. Kelesi jyly kásiporynnyń óndiristik qýaty táýligine 40 myń tekshe metr sý óndirýge jetpek. Osylaısha oblys halqy tutynatyn aýyzsýdyń jartysyn óndirý múmkin bolmaq.
Memlekettik qoldaýdyń arqasynda Mańǵystaý oblysynda jemisti jumys istep turǵan kásiporyndardyń taǵy biri – «Maǵash nan» JShS. Bul seriktestik tek oblysta ǵana emes, búkil elimiz boıynsha eń iri nan kombınaty bolyp tabylady. Búginde munda unnan daıyndalatyn kondıterlik, nan jáne makaron ónimderiniń 150-den astam túri shyǵarylady. Kásiporynnyń eńbek ujymymen kezdesken Muhtar Qul-Muhammed qazirgi zamanǵy nemis tehnologııasynyń jumysymen tanysty.
Mańǵystaý oblysy elimizdegi eń basty munaı óndiretin óńirlerdiń biri ekeni belgili. Sonymen qatar búginde oblysta qaıta óndeý óndirisiniń de ósý qarqyny anyq baıqalady. Tek bıyldyń ózinde ındýstrııalyq-ınnovasııalyq damý memlekettik baǵdarlamasy boıynsha oblysta jalpy somasy 70 mıllıard teńgeden asatyn jeti iri jobany júzege asyrý josparlanyp otyr.
Sondaı-aq «Nur Otan» partııasy Tóraǵasynyń birinshi orynbasary óńirdegi óndiris oryndaryna bilikti mamandar daıarlaıtyn Mańǵystaý polıtehnıkalyq kolledjinde boldy. Qazirgi tańda bul bilim oshaǵy elimizdegi eń úzdik on orta arnaıy oqý oryndarynyń qatarynda. Munda dánekerleýshi, tokar, metall óńdeýshi sııaqty oblysta joǵary suranysqa ıe 20 mamandyq boıynsha mamandar daıarlaıdy. Kolledjde 71 oqý kabıneti, 6 sheberhana jáne 9 laboratorııa jumys isteıdi. Barlyq kabınet zamanaýı qondyrǵylarmen jabdyqtalǵan. Sonyń ishinde burǵylaý jumysynyń, avtomobıldiń jáne dánekerleý isiniń vırtýaldy jattyǵý quraldaryn erekshe atap ótken jón. Odan bólek, frezer, tokar stanoktary men 7 kompıýter synyby jáne ınteraktıvti taqtamen jabdyqtalǵan 64 kabınet bar.
Elbasy, «Nur Otan» partııasynyń Tóraǵasy Nursultan Nazarbaev árdaıym jastarǵa erekshe kóńil bólip keledi. Taıaýda ótken partııa Saıası keńesiniń keńeıtilgen otyrysynda Memleket basshysy jastarǵa zor senim artyp, olardyń qoǵamdyq sanany jańǵyrtýdyń aldyńǵy leginde júrýi kerektigin aıtqan bolatyn. Osy tapsyrmany basshylyqqa alǵan partııa Tóraǵasynyń birinshi orynbasary óńirdegi orta jáne joǵary oqý oryndarynyń oqytýshylarymen jáne stýdentterimen kezdesti. О́z sózinde Muhtar Qul-Muhammed Elbasy aldymyzǵa qoıyp otyrǵan mindetterdiń, sonyń ishinde qoǵamdyq sanany jańǵyrtýdyń mańyzy men mánine nazar aýdardy. Kezdesý barysynda oblystaǵy talantty, qoǵamdyq jumystarǵa belsene qatysyp júrgen, óz isteriniń naǵyz maıtalman mamandary sanalatyn on jas azamat partııa qataryna qabyldanyp, olarǵa partııalyq bıletteri saltanatty jaǵdaıda tapsyryldy.
Sonymen qatar Muhtar Qul-Muhammed partııanyń oblystyq aktıvimen kezdesip, onda Memleket basshysynyń Saıası keńes otyrysynda bergen tapsyrmalaryn júzege asyrý jóninde uıymnyń aldynda turǵan naqty mindetterdi atap ótti.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
