Taıaýda Qaraǵandy shahary kúıshi, ataqty halyq kompozıtory Aqqyz (Múgúlsim) Ahmetqyzynyń týǵanyna 120 jyl tolýyna oraı tamasha kesh osy jaıttarǵa kýá qylǵan.
Dombyranyń dańqyn asqaqtatqan aq ájeniń qurmeti úshin uıymdastyrylǵan óreli keshke óner sańlaqtarynyń talaıy jınaldy. Sharaǵa shyr-pyr bolyp júrgen kúıshiniń urpaǵy, óner janashyry Bolat Tákishev esimdi azamat. Eki kúnge sozylǵan sharalar sherýi áýeli Kenshiler mádenıet saraıynda baspasóz máslıhatynan bastaý aldy. Ol keleli jıynǵa Qazaqstannyń eńbek sińirgen qaıratkeri, «Qurmet» ordeniniń ıegeri, ónertanýshy, kúıshi Jarqyn Shákárim bastaǵan ulyq ónerdiń rýhanı ýákilderi qatysty. – Kezinde Sáken Seıfýllın, Qalı Baıjanov, Manarbek Erjanov, Maǵaýııa Hamzın, Kúlásh Baıseıitova syndy talant ıeleri ónerin erekshe baǵalap, HH ǵasyrdaǵy dúldúl kúıshi, halyq kompozıtory Aqqyz anamyzdyń aldynda bolyp, 1967 jyly ónerimdi kórsetip, batasyn alǵan edim.
Endi mine 50 jyl ótkende Janǵalı baýyrymnyń janynda júrip, Arqanyń keremet shertpe kúıshileriniń ortasynda bolyp men de sahnaǵa shyǵyp, úsh ishekti dombyrammen kúı oryndap berdim, – deıdi Jarqyn Shákirim. Ol nebári jıyrma jasynda Aqqyz kúıshiden baryp suhbat alǵanyn aıtady. Osydan elý jyl buryn «Ortalyq Qazaqstan» gazetinde jarııalanǵan sol suhbatty eske ala otyryp: – Aldyna barǵan mýzykalyq ýchılısheniń (qazirgi Táttimbet kolledji) stýdenti, «Apa, kúıińizden úıretińiz?» desem, «Bizdiń kúıdi qoıa turyp, áýeli Táttimbet babańnyń kúılerin úıren» dep, Tátekeńniń eki-úsh kúıinen soń baryp, óziniń kúılerin tartyp, kórsetken edi, deıdi taǵy.
Qazaqstannyń eńbek sińirgen qaıratkeri, Qazaq ulttyq óner ýnıversıtetiniń professory, dáýlesker kúıshi Janǵalı Júzbaev bolsa, Aqqyz Ahmetqyzynyń kúı óneri týraly jazyp, qurastyrǵan «Muńdy qyz» kitabynyń tusaýyn kesip, keshti tizgindedi. «Muńdy qyz» – Aq ájeniń óz kúıi. 14 kúıi notaǵa túsirilip engizilgen eken kitapqa. Kúıshiniń shyǵarmashylyq murasynyń erekshelikteri men kompozıtorlyq keńistigi jaıly taqyryp mazmuny «Arqanyń Aqqyzy» kúı keshinde ashyla tústi. «Bolashaq» baspasynda qattalǵan qalyń kitaptyń ishi qazyna men baılyqqa syqap tur.
Kúı keshine ádette halyq jınala bermeıdi. Al atalmysh keshke Arqadan aǵyl-tegil jurt
jınalǵan. Shertpe kúı sheberiniń kúılerimen birge ánderi shyrqaldy. Abyz keshti Aqyn Dáýletkereı Kápuly Aq ájege arnaǵan óleńimen ashyp, ol óleń Aqqyzdyń kúıshi Qalken Qasymov tartqan «Jetim qyz» kúıimen jalǵasyp jatty. Aqqyz mektebiniń aq qyzdary Gúlnar Sháripova, Kúlmara Rahymbekova shertken kúıler de sher men shattyqqa qatar oıysyp otyrdy. «Toqyraýyn tolqyndary» halyqtyq án-bı ansambli S.Aqsuńqarulynyń «Shaıtankóli» men A.Jumashevtiń «Án mekeni – Aqtoǵaıyn» oryndady. Oblystyq «Kúı kerýen» shertpe kúı ortalyǵynyń tóraǵasy, kúıshi Qaırolla Sádýaqasov Aqqyz «Qosbasarynyń IV túrin» tart-
sa, Táttimbet atyndaǵy óner kolledjiniń oqytýshysy, kúıshi Madııar Súleımenov «Qarshyǵaly kezim-aıyn» shertti.
Qazaq ulttyq án ónerinde de ózgeshe órnek qaldyrǵan Aqqyz kúıshiniń «Saǵynysh» ánin klassık ánshi Dáýrenbek Árkenov shyrqap salsa, Baljan Serikbolqyzy «Qaıran elim» kúıin kúńirentti. О́nertaný ǵylymynyń magıstri Manap Anyqbekov tartqan Aqqyz «Qosbasarynyń I túri» de sátimen shyqty. Budan keıin Aqtoǵaı aýdanyndaǵy Aqqyz atyndaǵy balabaqshanyń tárbıelenýshileri óner kórsetti. Aq ájege arnalǵan óleńder oqyp, kúıshiniń ánin saldy. Amantaı Jumashev pen Nuraı Tanabaev «Aqtoǵaı – altyn besigim» ánin oryndasa, keshti elimizdiń Eńbek sińirgen ártisi, kúıshi, kompozıtor Seken Turysbek «Aq jaýyn» kúıimen túıindedi.
Mıras ASAN,
«Egemen Qazaqstan»
Qaraǵandy oblysy
